Мээндиги нэһилиэгин олохтоохторо 2024 сылы бэрт сэргэхтик көрүстүлэр. Олохтоох дьаһалтата, култуура тэрилтэтэ дьонноргар-сэргэлэригэр умнубат түгэннэри бэлэхтээтилэр. Онтон кыратык сэгэтэн ылыаҕын эрэ.
“Нэһилиэкпит 2024 сылы көрсөр тэрээһинигэр «Алгыс» СК үлэһиттэрин уонна ыччаттарбыт, самодеятельнай артыыстарбыт көмөлөрүнэн Саҥа дьыллааҕы представление турда. Тэрилтэлэр икки ардыларыгар ыытыллыбыт инсценировкалар күрэхтэригэр оскуола кэлэктиибэ «Курочка Ряба» остуоруйаны аныгылыы оҥорон көрдөрөн 1-кы миэстэни ылла. 2-с бириистээх миэстэни «Туллукчаан» уһуйаан үлэһиттэрэ ылан үөрдүлэр-көттүлэр. Сыл түмүгүн таһааран үлэ, спорт, уопсастыбаннай үлэлэр бастыҥнарыгар наҕараадалар, номинациялар туттарылыннылар.
Сыллата «Мээндиги нэһилиэгэ» МТ дьаһалтата «Бастыҥ Саҥа дьыллааҕы киэргэтии» диэн онлайн конкурс биллэрэр. Нэһилиэк олохтоохторо олбуордарын иһин киэргэтиитин ахсынньы 31 күнүгэр диэри видеоҕа устан «Мээндиги олохтоохторо» диэн ватсаппыт бөлөҕөр ыыталлар. Быйылгы сылга сиэдэрэй оҥоһуулаах Лена Петровна, Степан Ильич Владимировтар дьиэ кэргэн дьон-сэргэ биһирэбилин ылан 1-кы миэстэ буоллулар. 2-с бириистээх миэстэ Изабелла Владимировна, Иван Николаевич Давыдовтар буолан үөрдүлэр-көттүлэр, 3-с миэстэ Мария Петровна, Алексей Ильич Олесовтар уонна Розалия Григорьевна, Александр Геннадьевич Охлопковтар буолан бириистэринэн, грамоталарынан наҕараадаланнылар. Маннык күрэх тэриллэн дьон-сэргэ сүргэтэ көтөҕүллэр, нэһилиэкпит олохтоохторун талааннарын таһаарар, кэрэҕэ-сырдыкка угуйан, оҕо саас умнуллубат үтүө түгэннэрин бэлэхтиир. Инникитин да бу үтүө үгэс салгыы сыллата ыытыллан, кыттааччы ахсаана элбии туруоҕун баҕарабыт. Өссө төгүл нэһилиэкпит олохтоохторун үүммүт сылынан истиҥник эҕэрдэлиибин”, — диэн нэһилиэк баһылыгын солбуйааччы Альбина Филиппова сырдатта.
“Амма олоҕо” хаһыат
