Дойду бэрэсэдьиэнэ сыл ахсын ыытыллар пресс конференцията уонна нэһилиэнньэни кытта быһа эпиирэ быйыл холбуу ыытылланнар элбэх ыйытыы киирдэ.Түөрт чаастан ордук барбыт биэриигэ, күүтүллүбүтүн курдук, доруобуйа харыстабылыгар, чуолаан каадырдарынан хааччылыыга улахан болҕомто уурулунна.
Амма улууһун кылаабынай бырааһа Михаил АРХИПОВ бу салааҕа Дойду салайааччытын этиитин ордук болҕойон иһиттэ уонна „Земскэй быраас“ бырагыраама туһунан санаатын үллэстэр:
—Бу бырагыраама саҥа үлэлээн саҕалыырыгар, Аммаҕа 2011 сыллаахха биир бастакынан хирурдар үлэлии кэлбиттэрэ. Ол кэмтэн ылата 30-тан тахса быраас кэлэн барда. Сорохтор салгыы хаалан үлэлии сылдьаллар. Ити эппит сыыппараларбыттан даҕаны көстөр – материальнай көмө саҥа үлэлээн эрэр исписэлиистэргэ улахан өйөбүл буолар. Көрүллэр харчы суумата 2020 с. диэри биирдии мөлүйүөн эбит буоллаҕына, 20 21 сылтан Уһук Илин регионугар 2 мөл.солк. диэри үрдээбитэ
Кэнники 3 сылга биһиэхэ, Амма улууһугар 8 быраас кэллэ: лаборатория, оҕо быраастара, ЛОР, терапевт, гинеколог үлэлии сылдьаллар. Орто сүһүөх медицинскэй персоналга, фельдшердэргэ уонна акушеркаларга эмиэ ити бырагыраама үлэлиир, ол эрээри чуолаан фельдшерскэй-акушерскай пууҥҥа уонна суһал көмөҕө үлэлиир фелдьшердэргэ диэн. Маннык өҥөнү биһиэхэ 3 эдэр исписэлиис туһаннылар, билигин үлэлии сылдьаллар.
Онон бэҕэһээ программа уһуур диэн Президент этиитин общественность даҕаны, доруобуйа харыстабылын эйгэтин үлэһиттэрэ даҕаны үөрэ иһиттибит. Үлэһиттэр өссө кэлиэхтэрэ диэн эрэнэбит.
„Амма олоҕо“ хаһыат.