Үлэ Дьоруойа П.И.Яковлев аатынан Амма Наахара орто оскуолатын эр хоһууннара 8-11 кылаас уолаттарын кытта муус ылыытыгар кыстыкка киириигэ субуотунньук тэрийдилэр.
«Үгэс быһыытынан сыл ахсын нэһилиэк тэрилтэлэрэ үллэстэн, тэрилтэлэрбит соҕотох олорор бэтэрээннэригэр, аҕам саастаах соҕотох үлэһиттэрбитигэр, анал байыаннай дьайыыга сылдьар уолаттар төрөппүттэригэр субуотунньук тэрийэн, муус ылан, тиэйэн киллэрэбит. Ол сиэринэн оскуолабыт эр дьоно үөрэнээччилэрбитин кытары Амма эбэбитгэр киирэн күргүөмүнэн үлэлээтибит. Бу күн 11 ыалга муус ылылынна. Мууспутун өрөбүллэргэ тиэйэн киллэриэхпит. Оскуолабыт 8-11 кылааска үөрэнэр уолаттара тэриллибит үлэттэн үгүһү биллилэр. Тыа сирин аҕалара биллэн туран оҕолорун бары үлэҕэ эрдэттэн сыһыараллар. Онтон кэлэктиибинэн үлэ иллээх буолууга, элбэх үлэни кыайа тутууга, доҕотторгун кытары алтыһыыга олус туһалаах. Үлэнэн иитии хаһан да куһаҕаны оҥорбот. Биһиги эр дьон оҕолорго барыга холобур буолуохтаахпыт. Үлэттэн дуоһуйуу, хамсана сылдьыы, доруобай буолуу киһиэхэ бэйэтэ туспа иэйиини киллэрэр, киһи олоҕун уһатар дии саныыбын», — диэн оскуола дириэктэрэ Василий Яковлев санаатын үллэстэр.
Сибиэһэй салгын, көхтөөх үлэ, биир сомоҕо буолуу — бу күн оскуола кэлэктиибин биир долгуҥҥа киллэрдэ. Нэһилиэкпит үлэни өрө туппут дьонугар, кэлэр кэскиллээх кэнчээри ыччаттарбытыгар бары чэгиэн-доруобай буолуҥ, уйгулаах олохтонуҥ диэн баҕа санаабытын тириэрдэбит. Ханна баҕар, хаһан баҕар «Ойуурдаах куобах охтубат, дьонноох киһи тутайбат», «Сүгэ кыайбатаҕын, сүбэ кыайар» диэн саха өс хоһоонноро үгүһү этэллэр, инникигэ эрэли үөскэтэллэр.
Ирина КОРЯКИНА-ОЛЕСОВА
Александр Никитин хаартыскаҕа түһэриилэрэ