Бүгүн Аҕа Дойду көмүскээччилэрин күнүгэр Чапчылҕан нэһилиэгэр долгутуулаах тэрээһин ыытыллынна. Бу күн баара эрэ 20 сааһыгар геройдуу хорсун быһыыны көрдөрөн сырдык тыынын толук уурбут Филипп Лобанов бюһугар сибэкки дьөрбөтүн уурдулар, орто оскуола түмэлигэр нэһилиэккэ улаатан, үүнэн тахсыбыт хорсун уолаттарга Филипп Лобановка, анал байыаннай дьайыыга «Хорсунун иһин» уордьанынан наҕараадаламмыт, Дойду интэриэһин көмүскээһиҥҥэ геройдуу охтубут Александр Сысолятиҥҥа уонна Николай Тимофеевка анаммыт стендэлэри астылар.
Аҕа дойдуну көмүскээччилэр күннэригэр анаан Чапчылҕан орто оскуолатыгар ыытыллыбыт тэрээһин «Кыһыл сулус» уордьан кавалера Филипп Лобанов аатынан сквергэ миитинтэн, сибэкки дьөрбөтүн уурууттан саҕаланна. Манна кыттыыны улуус баһылыга Степан Кузьмин, баһылыгы бастакы солбуйааччы Василий Бураев, тутууга солбуйааччы Виктор Смирников, нэһилиэк баһылыга Дьулустан Юшков ыллылар. Амма айар куттааҕа Дария Васильева- Амма Даайыс Филипп Лобановка анаммыт хоһоонун долгутуулаахтык аахта. Тэрээһиҥҥэ Амма 1№-дээх орто оскуолатын юнармеецтара кыттыыны ыллылар.
Бу кэнниттэн оскуолаҕа стендэлэри үөрүүлээхтик аһыы түгэнэ буолла. Ол курдук Чапчылҕаннар бэйэлэрин хорсун биир дойдулаахтарыгар анаан «Шагнувшее в бессмертие» диэн оскуола түмэлигэр стендэ аспыттарын кэпсээтилэр. Оскуола кыараҕаһынан түмэл билигин стендэлэринэн оҥоһуллубут.
Матырыйаал элбэх, инникитин саҥа оскуола тутуллуннаҕына, түмэл анал хостонуо, онно оскуола историятын сэргэ, киэн туттар биир дойдулаахтарын туһунан кэпсиир экспонаттар саҥалыы тыыннаныахтара турдаҕа.
Үөрүүлээх чааска эҕэрдэлэрин улуус баһылыга Степан Кузьмин, нэһилиэк баһылыга Дьулустан Юшков тириэртилэр, дойдуларын интэриэһин чиэстээхтик көмүскээн бэйэлэрин ааттарын үйэтиппит, «Хорсунун иһин» уордьаннаах Александр Сысолятин, Николай Тимофеев чугас аймахтара, доҕотторо уолаттар тустарынан кэпсээтилэр, кинилэр хайдах курдук дойдуларын таптыылларын, ол туһугар олохторун толук уурбуттарын олус долгуйан туран сырдаттылар.
Оскуола дириэктэрэ Оксана Емельянова, түмэл салайааччыта Наталья Попова саҥа арыллыбыт стендэ суолтатын, түмэл туһунан кэлбит тэрээһин кыттыылаахтарыгар кэпсээтилэр. Кэлбит ыалдьыттар «Движение первых» хамсааһын чилиэннэрэ Филипп Лобанов туһунан хоһоону, кырачаан уолаттар «Перелетные птицы» диэн ырыаны бэрт ылбаҕайдык толорбуттарын сэргээн дохсун ытыс тыаһын бэлэхтээтилэр.
«Амма олоҕо» хаһыат