Амма улууһун Бөтүҥ нэһилиэгин киэн туттар кыыһа, фармацевтическай наука доктора, профессор Надежда Константиновна Чириковаҕа «РФ наукаларын уонна үрдүкү технологияларын бочуоттаах үлэһитэ» үрдүк аат иҥэрилиннэ.
Надя оҕо сааһыттан үөрэххэ дьоҕурдаах буолан Бөтүҥ оскуолатын аатын олимпиадаларга элбэхтик көмүскүүрэ, араас ааҕыыларга ситиһиилээхтик кыттара. Ордук Валентина Ивановна Дьячковская үөрэтэр биология, химия уруоктарыгар сөбүлээн үөрэнэрэ. Оскуоланы үрүҥ көмүс мэтээлинэн бүтэрээт СГУ биолого-географическай факультетыгар үрдүк үөрэххэ үөрэммитэ. Университекка эмиэ ситиһиилээхтик үөрэнэн, үөрэҕин кыһыл дипломунан бүтэрбитэ. Үөрэнэр кэмигэр араас бырайыактарга, научнай үлэлэргэ кыттан саҕалаабыта. Туйгун билиилээх Надежда Константиновна тутатына аспирантураҕа фармацевтическай химия хайысханан билиитин хаҥата үөрэҕин салҕаабыта. 2007 сыллаахха үөрэҕин бүтэрэн үөрэммит кыһатыгар идэтинэн үлэлээн барар. Бу кэмнэргэ үлэлии сылдьан 2009 сыллаахха эдэр учуонайдар икки ардыларын күрэҕэр «Инновационная идея-2009» үлэнэн кыттан СӨ Президенэ олохтообут Гранын ылар. Үлэтинэн, билиитинэн элбэх научнай конференцияларга кыттан фармацевтическэй наука докторын үрдүк аатын сүгэр. Профессор Надежда Константиновна Бөтүҥ нэһилиэгин үс оҕолоох Екатерина Евсеевна, Константин Денисович Чириковтар ортоку оҕолоро буолар.
Бүгүн Надя күн сирин көрбүт күнүгэр кэлбит улахан ситиһиитинэн, таһаарыылаах үлэтинэн үөрэммит оскуолатын, тапталлаах Бөтүҥүн, Амматын, Саха сирин ыраах дойдуларынан ааттата сылдьарынан биир дойдулаахтара олуһун үөрэн, киэҥ туттан эҕэрдэбитин ыытабыт.
Билим эйгэтигэр биллибит эдэр кыыспытыгар Надежда Константиновнаҕа куруутун ыра санаан ситтин, туруоруммут сыалын-соругун барыта туолан кынат үүннэрдин диэн баҕа санаабытын тириэрдэбит. Ис сүрэхтэн тахсар үтүө тыл кый ыраах көтөн инникитин өрүү ситиһиилиин сиэттиһэ сырыт, кыайыыгар кыттыспыт санааларын өссө күүһүрэн тус олоххор дьол-соргу тосхойдун диэн алгыспытын ыытабыт.
Ирина Корякина-Олесова, хаһыат общественнай корреспондена.