Бүгүн, Амматааҕы академик Л.В. Киренскэй аатынан лиссиэйгэ төрөөбүт тыл уонна сурук-бичик нэдиэлэтин үөрүүлээх аһыллыыта алгыһынан саҕаланна.
Үөрүүлээх линейкаҕа лиссиэйи бүтэрбит, дойдуларын араас муннуктарыгар үөрэнэр, олорор, үлэлиир выпускниктар куйаар ситимин нөҥүө төрөөбүт тылларыгар тапталларын, учууталларыгар махталларын тириэртилэр. Төрөөбүт тылы үөрэтии хаһан да хойут буолбатын тоһоҕолоон бэлиэтээтилэр. Ол курдук Дьокуускайтан ХИФУ 3-с кууруһун устудьуоннара Артем Лукин, Констанция Яковлева, Майаттан Анжелика Никитина, Амматтан Туймаада Захарова, Санкт- Петербургтан Жасмина Колосова, Иркутскайтан Александра Левина, Владивостоктан Саргы Васильева, Дарина Кузьмина уонна Казахстантан хомусчут Эркин Алексеев сахалыы уран, эҕэрдэ тылларын бастыҥын анаан, оҕолору төрөөбүт тылларын иҥэн-тоҥон үөрэтэллэригэр ыҥырдылар. Маны тэҥэ, ХИФУ доцена, педагогическай наука кандитата Галина Алексеевна Захарова оҕолорго уонна үлэлээбит оскуолатыгар тус эҕэрдэтин ыытта. Салгыы кылаастарынан тарҕаһан төрөөбүт тыл тула кылаас чаастара ыытылыннылар. 8 “а”, 8 “б” кылаастарга улуустааҕы бибилэтиэкэттэн Ньургуйаана Сивцева оҕолорго олоҥхо аахтаран, бэрт сэргэх кылаас чааһын ыытта.
Наталия РЯЗАНСКАЯ