Бүгүҥҥү күнтэн Амма улууһун бары нэһилиэктэригэр СӨ Бырабыыталыстыбатын бэрэссэдээтэлин солбуйааччы Сергей Местников салайааччылаах отчуоттуур бөлөх икки хайысханан үлэтин саҕалаата. Ол курдук бастакы бөлөх (салайааччы С.В. Местников) Амма Наахара, Болугур уонна Покровка нэһилиэктэригэр сырытта.
Амма Наахара нэһилиэгэр хаһан да буоларын курдук отчуокка олохтоохтор олох тоҕо анньан кэлэн иһиттилэр, кыһалҕалаах боппуруостарын туруорустулар. Уопсайа 10-тан тахса боппуруос турда, уопсайа 88 киһи кэллэ. Ол курдук олохтоохтор Амма өрүһү харыстааһыҥҥа туох оҥоһулла сылдьарый, бэйдиэ сылдьар ыттары утутуу туһунан Сокуон хаһан ылылларый, нэһилиэкпитигэр сытар балыыһа арыллыыта, саҥа кулууп дьиэтэ тутуллуута, хаарбах дьиэттэн көһөрүү бырагыраама салҕаныытын, оскуола бибилэтиэкэлэрин ааҕар кинигэнэн хааччыйыы туһунан, Болугур нэһилиэгэр АЗС үлэтин туһунан ыйыталастылар. Манна барытыгар туһааннаах салайааччылар эппиэттэри биэрдилэр. “Дуораанчык” уһуйаан сэбиэдиссэйэ Полина Кононова нэһилиэктэригэр хайаатар да балыыһа да сытар куойкалаах буолара наадатын эттэ уонна инникитин отчуоттарга сокуону оҥорор Ил Түмэн дьокутааттара кэлэн сылдьаллара наада диэн санаатын тириэртэ уонна ыытыллыбыт үлэни биһириирин биллэрдэ. Сергей Васильевич түмүк тылыгар нэһилиэк олохтоохторугар махталын биллэрдэ. Кини бу иннинээҕи отчуоттарга өссө оҕону ааҕарга уһуйууга оскуола бибилэтиэкэлэрин ааҕар кинигэнэн хааччыйыы туһунан көтөҕүллэ илик этэ диэн этэн туран, бу сөптөөх туруорсуу буоларын бэлиэтээтэ уонна бу боппуруоһу көтөхпүт оскуола бибилэтиэкэригэр Надежда Григорьеваҕа олоҥхо хомуруунньуктарын бэлэх уунна.
Болугурга саалаҕа эмиэ толору киһи муһунна. Олохтоохтор бэрт сытыытык боппуруостарын сэргэ, этиилэрин эмиэ киллэрдилэр. Уопсайа 120 киһи сырытта, 20-тэн тахса боппуруос киирдэ. Болугур улууска Амма нэһилиэгин кэнниттэн иккис улахан нэһилиэк буолар. Ол гынан баран манна АЗС үлэтин тохтотон турар буолан улахан эрэйи үөскэппит. Бу боппуруоһу быһаарар туһунан олохтоохтор Бырабыылалыстыбаттан көрдөстүлэр. Салгыы тыа хаһаайыстыбатыгар кадр боппуруоһа сытыырхайбыта, ынах сүөһү төбөтүгэр бэриллэр субсидия, киин ититэр ситимҥэ холбонуу, ыччат дьон дьарыктаналларыгар спортсаала тутуута уолдьаспытын кыһалҕалара олохтоохтору олус долгутар. Маныаха Бырабыыталыстыба болҕомтотун хайаатар да уурарыгар санааларын тириэртилэр. Ону тэҥэ “Амма” региональнай таһымнаах айан суолун өрөмүөнүн эмиэ таарыйдылар. Бу боппуруостарга барытыгар Сергей Местников, улуус баһылыга Степан Кузьмин уонна туһааннаах тэрилтэлэр салайааччылара сиһилии эппиэттээтилэр.
“Эһиги ыйытыыларгыт олох төрдүттэн олохтоох ыйытыылар. Күннээҕи боппуруостар буолбатах. Тыа сирин сайдыытыгар туһаайыллыбыт ыйытыыларгыт биһигини тургутан көрдүлэр диэххэ сөп. Этиилэргит бары сөптөөхтөр. Өрүс сүнньүгэр олороргут быһыытынан айылҕа боппуруоһа долгутар, ону биһиги сөпсөһөбүт уонна Бырабыыталыстыба таһымыгар көрөн айылҕабытын харыстыыр, инники көлүөнэҕэ тириэрдэр соруктаах дьон буолабыт. АЗС боппуруоһа сир аайы турар боппуруос буолбатах. Эһиги нэһилиэккитигэр, Покровка-Болугур-Амма Наахара хайысхатыгар сытыытык турар боппуруос диэн Бырабыыталыстыба таһымыгар өйдөөтүбүт. Манна үлэлэһиэхпит. Спортсаалаҕа бырайыакка улуус, нэһилиэк дьаһалтатын кытта үлэлэһиҥ”, — диэн эттэ бөлөх салайааччыта түмүктүүр тылыгар уонна олохтоохторго бэйэтин махталын биллэрдэ.
Покровкаҕа да кэлии эмиэ үчүгэй. Отчуоту 50 киһи кэлэн иһиттэ, 10-тан тахса боппуруос бэрилиннэ. Манна сүрүннээн тыа хаһаайыстыбатын боппуруостара турдулар. Ол курдук “Амма” ААО дириэктэрэ Роман Спасьев уонна уопсастыба кэтээн көрөр Сэбиэтин бэрэссэдээтэлэ Ольга Огурешникова кинилэр оҥорон киллэрбит сиэмэ бурдугунан өрөспүүбүлүкэни хааччыйыы бырагырааматын ылыналларыгар көрдөстүлэр. Ити курдук покровкалар эмиэ төбөҕө бэриллэр, хаһаайыстыбаларга көрүллэр субсидия барыытын механизмын уларытыы, тыа хаһаайыстыбатын эйгэтигэр үлэлиир ыччат суох кэриэтэ буолан иһэрин, сүөһүлээх дьоҥҥо сир учаастагын биэрии, квартальнай хочуолунайы саҥардыы, газтааһын уонна биллэн туран саҥа оскуола-сад тутуутун, дьон маассабай спордунан дьарыктаныытын уонна да атын боппуруостары көтөхтүлэр. Киирбит ыйытыыларга барыларыгар толору эппиэттэр бэрилиннилэр. Отчуот кэнниттэн сытыытык турбут хочуолунай туругун баран билистилэр.
Ити курдук бастакы отчуот күнэ түмүктэннэ. Дьон-сэргэ бу нэһилиэктэргэ сэргэхтик кэлэн кыттан, санаатын аһаҕастык этэн баран, икки өртүттэн астынан тарҕастылар. Хас нэһилиэк аайы бастыҥнарга СӨ Бырабыыталыстыбатын бэрэссэдээтэлин солбуйааччы Сергей Местников наҕараадалары, ону сэргэ улуус баһылыга Степан Кузьмин эдэр ыалларга улуустан бэриллэр субсидия харчытын сэртипикээтин туттардылар. Сарсын бастакы бөлөх Мээндиги, Чапчылҕан уонна Чакыр нэһилиэктэригэр сылдьыа. Онтон иккис бөлөх Сулҕаччы, Сэргэ Бэс уонна Соморсун нэһилиэктэрин олохтоохторун кытта көрсүө.
“Амма олоҕо” хаһыат