Ийэ тыл уонна сурук-бичик күнүн чэрчитинэн Чапчылҕан нэһилиэгэр аҕа саастаах дьон түмсүүтэ тэрийиитинэн «Мин төрүт тылым — саха тыла» уонна «Төрөөбүт дойдубар тапталым» диэн тиэмэҕэ орто оскуола 5-11 кылааһын үөрэнээччилэрин ортолоругар сахалыы тылынан уустаан-ураннаан хоһоон айыыга уонна сахалыы хоһоон ааҕыытыгар күрэх ыытылынна.
Биһиги нэһилиэхпитигэр оҕо уһуйаана уонна оскуола нууччалыы тылынан үөрэтэр, онон эдэр көлүөнэ ыччаппыт төрөөбүт тылларын-өстөрүн, сахалыы толкуйдарын умнубакка илдьэ сылдьалларынгар бу тэрээһин туһуланна. Аҕа саастаах дьон түмсүүтүн биир көхтөөх киһитэ Нина Егоровна Устинова көҕүлээһининэн күрэх тэрилиннэ.
Оҕолор сүрдээҕин кыһаллан ылынан, бэйэлэрин кыахтарынан хоһоон суруйарга холонон көрбүттэрэ, сахалыы хоһоону дорҕоонноохтук аахпыттара — бу эмиэ инникигэ хардыы. Дьүүллүүр сүбэҕэ аҕа саастаах дьон түмсүүтүттэн Нина Устинова, хоһоон айааччы Татьяна Семёнова — Татыйаас, олохтоох библиотека үлэһитэ Елена Дьячковская, Чапчылҕан орто оскуолатыттан Семёнова А.В. үлэлээтилэр.
Дьүүллүүр сүбэ быһаарыытынан 1 миэстэни Торопова Сайыына, 2 миэстэни Устинов Кирилл, 3 миэстэни Кралин Артём ыллылар.
Оҕолорго уостан хаалбакка салгыы өссө ылсыһан төрүт тылбытын — сахабыт тылын интириэһиргээн, дириҥэтэн үөрэтэллэригэр баҕарыаҕыҥ.
Сахалыы тылы таптаан
Сүгүрүйэ махтаныҥ,
Сөҕөҥҥүт сэргээҥ,
Сып-сырдык кэрэ,
Сып-сылаас сүмэтин
Сэҥээрэ ылыныҥ.
Марфа Гаврильева.