Болугур нэһилиэгэр Арассыыйатааҕы «Оҕо күүтэр Ийэлэр анал күннэрин» бэлиэтээтилэр. Манна ыаллыы сытар нэһилиэктэртэн дэлэгээссийэлэр кэлэн кыттыыны ыллылар. Аан бастакытын «Оҕо күүтүү — саҥа олоххо үктэл» диэн кустовой семинар сэргэхтик, таһаарыылаахтык ааста.
Сонун семинар үрдүк категориялаах акушер — гинеколог, СӨ уонна РФ доруобуйа харыстабылын туйгуна Евдокия Долгунова уонна Болугур нэһилиэгин участковай балыыһатын үлэһиттэрэ, участковай быраас, СӨ доруобуйа харыстабылын туйгуна Татьяна Афанасьева, СӨ доруобуйатын харыстабылын туйгуна, үрдүк категориялаах акушерка Любовь Ноговицына көҕүлээһиннэринэн олус туһалаахтык, сэргэхтик ааста. Семинары нэһилиэк баһылыгын солбуйааччы Раиса Софронова аһан, кэлбит ыалдьыттары эҕэрдэлээтэ. Күн бастакы аҥарыгар кэлбит дэлэгээссийэ «Тускул» иитэр үөрэтэр киин иһинэн баар түмэлгэ сылдьан нэһилиэк туһунан кэпсиир матырыйааллары көрөн, салайааччы Сахаяна Кожурова сиһилии кэпсээн интириэһиргээн иһиттилэр . Ол кэннэ сынньалаҥ пааркабытыгар баран Ытык маска алаадьылаан, бу сайын өрөспүүбүлүкэтээҕи мас уустарыгар ыытыллыбыт Олоҥхо уобарастарын күрэҕин оҥоһуктарын көрөн, СӨ норуотун маастара Степан Устинов туой оҥоһуктарын көрөн сөҕөн — махтайан эбиэккэ тарҕастыбыт.
М.А. Ноговицын аатынан култуура киинигэр «Оҕо күүтүү — саҥа олоххо үктэл» семинары Болугурдааҕы врачебнай амбулатория үлэһиттэрэ иилээн-саҕалаан ыыттылар. Оҕону күүтүүгэ эрдэттэн бэлэмнэнии, сөптөөхтүк аһылыктарын көрүнүү, эрдэттэн учуокка туран төрүөхтэригэр диэри көрүллэн-истиллэн, хроническай ыарыылара төрүүр дьахтарга уустуктары үөскэтиэн сөбүн өйдөтөн-сэрэтэн, ону таһынан саҥа төрөөбүт эдэр ийэлэргэ ийэ үүтэ туһалааҕын, саҥа төрөөбүт оҕону көрүү-истии туһунан туһалаах сүбэлэри кэпсээтилэр. Семинарга Покровка, Амма Наахара уонна Чакыр акушеркалара оҕолоноору сылдьар кыргыттарын, эдэр ийэлэри илдьэ кэлэн кыттыыны ыллылар, бэйэлэрин уопуттарын кэпсээтилэр, санаа атастастылар.
Семинар араас быһыылаахтык ааста. Ол курдук ийэ буолаары сылдьааччыларга аналлаах гимнастиканы көрдөрдүлэр уонна хамаанданан арахсан семинар чэрчитинэн төрүүр дьахтарга аналлаах 4 түһүмэхтээх конкурс-викторина ыытылынна.
Бэйэлэрин эҕэрдэлэрин «Мичийээнэ» ийэлэр ансаамбыллара нарын ырыанан, оҕолорун кытта «Талбаана» ийэлэр ансамбыллара үҥкүүнэн тиэртилэр. Болугурдааҕы участковай балыыһа кэлэктиибэ кэлбит ыалльыттары сылаас, минньигэс эбиэтинэн, семинар кэмигэр араас астаах фуршетынан күндүлээтилэр.
Маннык олус интэриэһинэй, туһалаах семинары тэрийбит Амма улууһун кылаабынай акушер-гинекологар Евдокия Степановна Долгуноваҕа уонна Амма Наахара, Майскай, Чакыр, Болугур акушеркаларыгар махтанабыт. Ийэ буолуу диэн — бу кырдьык сирдээҕи дьол буолар. Күн күбэй ийэлэрбит доруобай, чэгиэн буолуҥ, күн сиригэр баар бары кэрэни барытын эһиэхэ аныыбыт. Үлэҕит ситиһиилээх, махталлаах буоллун.
Евдокия ПЛАТОНОВА