Саҥа дьылы көрсө айар куттаах, чуолаан оҕолорго анаан суруйар дьоҥҥо үөрүүлээх түгэн тосхойдо. Оҕо литературатыгар аан бастакы бириэмийэ хаһаайынын булла. Үөрүүлээҕэ баар, кыайыылаахха 500 000 солкуобайдаах сэртипикээти уонна 4 бастыҥ айымньылаахтар кинигэлэрин бэчээттиир кыаҕы кинилэргэ аммалар бэлэхтээтилэр. «Алта» кинигэ кыһатын салайааччы Зинаида Архипова, «Саха сирин суруйааччылара» ассоциация бэрэссэдээтэлэ Олег Сидоров уонна урбаанньыт Руслан Федотов оҕо литературатыгар бириэмийэ олохтуур туһунан кэпсэтиилэрэ олоххо киирэн литература сайдыытыгар кэмнэммэт хардыы оҥоһулунна.
Бэҕэһээ, ахсынньы 18 күнүгэр оҕо литературатыгар меценат Руслан Федотов олохтообут бириэмийэтин туттарыы үөрүүлээх быһыыга-майгыга буолан ааста. Кини бастакы бириэмийэ кыайыылааҕар 500 тыһыынча солкуобайдаах сэртипикээти туттарда.
«Алта» кинигэ кыһатын салайааччы Зинаида Архипова, «Саха сирин суруйааччылара» ассоциация бэрэссэдээтэлэ Олег Сидоров уонна урбаанньыт Руслан Федотов оҕо литературатыгар бириэмийэ олохтуур туһунан сүбэлэһэннэр ааспыт сайын куонкурус биллэрбиттэригэр, ханна да бэчээттэнэ илик сүүрбэччэ айымньы киирбит.
Айымньылары норуодунай суруйааччы Елена Слепцова-Куорсуннаах салалатынан, бэйиэт, прозаик суруйааччылары сэргэ, саха тылын учуутала уонна «Айыы кыһатын» үөрэнээччитэ Анжелина Ильина оҕо хараҕынан көрөн, дьүүллээтилэр. Дьоһун дьон быһаарыыларынан, кыайыылааҕынан «Бастакы сээн» сэһэнинэн Валерия Потапова таҕыста. Киниэхэ Руслан Федотов 500 тыһыынча солкуобайдаах сэртипикээти туттарда.
Маны тэҥэ, 4 бастыҥ айымньылаах ааптардарга Ангелина Васильеваҕа («Аптаах таас»), Николай Бурнашовка («Үстүөпэ сырыылара»), Любовь Матвееваҕа («Дойдулаах оҕо»), Розалия Винокуроваҕа («Сайын») кинигэлэрин таһаарар туһунан сэртипикээти туттардылар. Бастыҥ ааптардар айымньылара эһиил «Дани-Алмас» кинигэ кыһатыгар бэчээттэниэхтэрэ.
— Саха тыллаах дьоҥҥо барыларыгар кэрэ-бэлиэ күн үүннэ дии саныыбын. Бу күрэс суолтата туохханый? Бу манна кыттыбыт дьон өссө биир сыл үлэлииллэр, ол түмүгэ 5 кинигэ буолан тахсар. Оҕо литературатыгар сиппит-хоппут 5 кинигэ баар буолар. Онон бу бырайыагы өйөөбүт Руслан Еремеевичкэ, идиэйэ ааптарыгар Зинаида Архиповнаҕа улахан махталбын тиэрдэбин. Бу бириэмийэ өссө кэҥээтин, дириҥээтин, өссө үчүгэй айымньылары аҕала турдун! — диэн Саха сирин суруйааччыларын ассоциациятын бэрэссэдээтэлэ Олег Сидоров баҕа санаатын тиэрдэр.
“Амма олоҕо” хаһыат.