Амма 1-кы №-дээх орто оскуолатын бибилэтиэкэтэ Борис Ельцин аатынан Бэрэсидьиэн бибилэтиэкэтин тиһигэр киирдэ. Бу үөрүүлээх сонуну оскуола бибилэтиэкэрэ Оксана Гаврильева улуус оскуолаларын бибилэтиэкэрдэригэр анаан ыытыллыбыт семинарга иһитиннэрдэ. Быйылгы үөрэх дьылыгар Санкт- Петербург куоракка баар Арассыыйа бастакы Бэрэсидьиэнэ Борис Ельцин аатынан бибилэтиэкэ тиһигэр киирэн тэйиччиттэн олорон холбонон үлэлиир кыах киирбитэ, бу оскуола үлэтигэр саҥа сүүрээн буолар.
Б.Н. Ельцин аатынан Бэрэсидьиэн бибилэтиэкэтэ 2009 сыл ыам ыйын 27 күнүгэр аһыллыбыта. Билигин ситим нөҥүө бу бибилэтиэкэни кытта үлэлииргэ кыах бэрилиннэ. Оскуола бибилэтиэкэтигэр үлэлиир усулуобуйа тэрилиннэ, элбэх киһи тэҥинэн олорон үлэлиир миэстэтэ оҥоһулунна. Бэлиэ күҥҥэ кыһыл лиэнтэни үөрэх управлениетыттан методист Диана Макарова, педагог бибилэтиэкэрэ Оксана Гаврильева быстылар. Семинар маҥнайгы чааһыгар Бэрэсидьиэн бибилэтиэкэтигэр стажировка, регистрацияланыы, фонданы кытары билсиһии буолла. Бибилэтиэкэ картотекатын кытта түргэн ньыманан үлэлииргэ үөрэнии, туһааннаах литэрэтиирэни булуу, бэйэ билиитин сөптөөх информациянан хаҥатыы бу ситим нөҥүө барыаҕа.
Диана Семеновна “учууталлар, үөрэнээччилэр үлэ, үөрэх өттүнэн эбии дьарыктаныыларыгар толору кыах бэрилиннэ” диэн тоһоҕолоон бэлиэтээтэ. Оксана Семеновна семинарыгар Олонхо дойдутун ситимниир “Аал луук мас” туһунан дьарыгын оскуола алын сүһүөҕүн оҕолоругар, күн иккис аҥаарыгар үлэтин уопутуттан туһалаах сүбэлэри, маастар-кылаастары ыытта. Мөлүйүөнүнэн фондалаах бибилэтиэкэни кытта үлэ улууспут саамай элбэх оҕолоох сүрүн оскуолатыгар, Амма уонна Эмис нэһилиэктэрин модельнай бибилэтиэкэлэригэр саҕаланна. “Бибилэтиэкэҕэ сылдьыҥ, туһаныҥ, билиигитин хаҥатыҥ”, — диэн Оксана Семеновна уонна семинар бары кыттыылаахтара баҕа санааларын тириэртилэр.
“Амма олоҕо” хаһыат