В.Г.Короленко аатынан Амма 1 № — дээх орто оскуолатын түмэлин иһинэн быйыл саас арыллыбыт улуус историятын араас өрүтүн көрдөрөр архивнай саалата бу күннэргэ сэдэх матырыйаалларынан эбилиннэ.
Оскуола 1977 сыллааҕы математическай кылааһын выпускницата, медицинскэй наука кандидата, СӨ үтүөлээх бырааһа Любовь Николаевна Ефимова (Никитина) үөрэммит оскуолатын түмэлин архивыгар ийэтигэр, СӨ үтүөлээх бырааһа, Үлэ Кыһыл Знамята орден кавалера, Аммаҕа сэллик ыарыыны утары охсуһууга олоҕун анаабыт фтизиатр- быраас Марфа Егоровна Никитинаҕа анаммыт «Связующая нить поколений» диэн өйдөбүнньүк саҥа күн сирин көрбүт кинигэтин буруолаппытынан бэлэх ыытта. Бу кинигэ бэйэтин форматынан, ис хоһоонунан, төрүччү чинчиллиитэ киирбитинэн дьоҥҥо- сэргэҕэ улахан интэриэһи тардыа дии саныыбын. Маны сэргэ Любовь Николаевна ийэтин 1950 сыллаахха Амма — Наахара 7 кылаастаах оскуолатын бүтэрбитин туоһулуур сибидиэтилистибэни эмиэ туттарда.
Бу сибидиэтилистибэҕэ оскуола дириэктэрэ Еремей Алексеев, учууталлар Иван Яковлев, Никанор Мартынов, Тарас Никитин илии баттаабыттар. Бу икки бэлэхтэр түмэл сана экспозициятыгар миэстэлэрин булуохтара. Манна эбии өссө дьиэтээҕи архыыбыттан үөрэнээччилэр, учууталлар уонна олохтоохтор туһаналларыгар анаан СӨ ураты харыстанар сирдэрин, үүнээйилэрин, үөнүн- көйүүрүн, балыгын, көтөрдөрүн, кыылларын тустарынан кэпсиир «Дар планете Земля» диэн аҕыйах ахсаанынан тахсыбыт, кэргэнэ Виктор Петрович Ефимов үлэлэспит справочник -кинигэтин бэлэхтээтэ.
Любовь Николаевна бу иннинэ өссө 2020 сыллаахха, түмэл архыыбыгар 40-ча сэдэх кинигэлэри бэлэхтээбитэ. Онон кынат анньыммыт кыһатын чугастык саныыр, ытыктыыр Любовь Николаевнаҕа оскуола кэлэктиибэ улахан махталын тириэрдэр. Убаастабыллаах улууспут дьонун-сэргэтин Амма №1-дээх оскуолатыгар сэдэх, улуус, дьиэ кэргэҥҥит историятын кэпсиир матырыйааллары, экспонаттары оскуола түмэлигэр, түмэл архыыбыгар туттаран дьон көрүүтүгэр, эрэллээх хараллыыга биэрэн Любовь Николаевна Ефимов холобурун батыһаргытыгар ыҥырабыт. Эһигини оскуолабыт түмэлигэр эрэнэ күүтэбит.
Вера Бессонова, академик Л.В. Киренскэй аатынан түмэл дириэктэрэ