Үлэ Дьоруойа П.И. Яковлев аатынан Амма Наахара орто оскуолатыгар Чурапчытааҕы физкультурнай институт иһинэн үлэлиир колледж устудьуоннарын кытта көрсүһүү бэрт сэргэхтик ааста.
Улахан кылаас үөрэнээччилэрэ аҕыйах сыллааҕыта оскуолабытыгар үөрэнэн, элбэх күрэхтэргэ оскуола чиэһин көмүскээбит маҥнайгы куурус устудьуонун Ньургустаан Гермогеновы уонна быйыл үөрэҕин бүтэрээри сылдьар, үһүс кууруска үөрэнэр Ньургун Илларионовы кытта көрүстүлэр. Көрсүһүүнү иитэр үлэҕэ дириэктэри солбуйааччы Матрёна Романова, оҕо тэрилтэтин салайааччыта Акулина Устинова, педагог — психолог Ирина Олесова тэрийдилэр. Бу көрсүһүүгэ устудьуон уолаттарбыт бэйэлэрин үөрэхтэрин, олорор уопсайдарын, устудьуон күннээҕи олоҕун сиһилии кэпсээтилэр. Үөрэххэ барарга медицинскай справка толотторуута, докумуону туттарыы, бэрээдэк, инники былааны хайдах оҥоруохха сөбүн сүрдээх интириэһинэйдик сэһэргээтилэр. Устудьуоннарга үөрэнээччилэр элбэх боппуруоһу биэрэн санаа атастастылар. Үөрэнээччилэр көрсүһүү түмүгүнэн оонньуу тэрийдилэр, устудьуон олоҕун кытары толору билистилэр.
Устудьуоннар быйыл оскуоланы бүтэрэр уонна 9-с кылаас кэнниттэн орто анал үөрэххэ барар оҕолорго экзаменнарын ситиһиилээхтик туттарсан, олох киэҥ аартыгар үктэнэллэригэр баҕардылар. Онтон үөрэнээччилэр устудьуон уолаттар үөрэхтэрин бүтэрэн, талбыт идэлэринэн үлэлээн этэҥҥэ сылдьалларыгар баҕардылар. Тэрийээччилэр устудьуоннарынан киэн тутталларын этэн туран кыракый өйдөбүнньүк бэлэхтэри утары ууннулар. Үөрэнээччи, устудьуон, учуутал икки ардыларыгар сылаас сыһыан кыһыҥҥы томороон тымныыны ититэн истиҥ эйгэни бу күн барыларыгар бэлэх уунна.
Ирина Корякина-Олесова.