Н.Е. Иванов аатынан Бөтүҥ орто оскуолатыгар Саха Өрөспүүбүкэтин Судаарыстыбаннаһын күнүгэр оҕо сайдарыгар туһуламмыт киин үөрүүлээхтик арылынна. Арассыыйаҕа Педагог уонна Наставник сылынан уонна дойдуга оҕо хамсааһынын чэрчитинэн Амма улууһугар биир бастакынан оҕо саҥа көҕүлээһинин арыйар киин тэрилиннэ.
Тэрээһини үөрэнээччилэр Лена Степанова уонна Айна Дьячковская ыыттылар. Бу дьоро күн мустубут оҕолорго эҕэрдэ тылларын оскуола дириэктэрэ Акулина Иванова уонна улуустааҕы үөрэх управлениетыттан куратор Майя Капитонова. Үөрүүлээх быһыыга – майгыга аалай лиэнтэни ”Эрэл” оҕо хамсааһынын салайааччыта Вилена Мартынова, саҥа талыллыбыт оскуола президенэ Айыына Иванова, орто сүһүөх лидера Тима Борисов, алын сүһүөх лидерэ Индира Чупрова быстылар.
Саҥа арыллыбыт киин аата да этэрин курдук үөрэнээччилэр саҥа сонун көҕүлээһиннэрин өйүүр, олоххо киллэрэргэ көмөлөһөр буолуо. Оҕолорбутун өйөөн, сайдалларыгар анаан усулуобуйа тэриллэн бу күнтэн ыла киин тигинэччи үлэлиэҕэ. Онтон оҕолор ымыы оҥостубут ыра санааларын олоххо киллэриэхтэрэ диэн эрэнэбит. Хос иһэ куруук оҕо сылаас мичээринэн, үөрүү-көтүү үктэлинэн туоллун. Мантан кынаттанан нэһилиэкпит, улууспут, өрөспүүбүлүкэбит, дойдубут киэн туттар ыччаттара үүнэн-сайдан таҕыстыннар.
Анастасия ЛАЗАРЕВА