В.Г. Короленко аатынан Амма 1№-дээх орто оскуолатыгар «Эбээ остуоруйата» диэн улуустааҕы остуоруйаны дьиэ кэргэнинэн толоруу түһүлгэтэ бэрт сэргэхтик ыытылынна. Бу интэриэһинэй күрэххэ алта дьиэ кэргэн кытынна.
Бу тэрээһини биһиги оскуолабытыгар СӨ үтүөлээх учуутала, РФ үөрэҕириитин туйгуна, Амма нэһилиэгин, Амма улууһун бочуоттаах олохтооҕо Александра Артемьева бырайыагынан оскуола алын сүһүөҕүн кылаастарын учууталларын холбоһуга иккис сылын тэрийэн ыытар. Быйыл Амма Наахараттан, Болугуртан, Бөтүҥтэн, Амма 1№-дээх оскуолатыттан уопсайа 6 дьиэ кэргэн кыттыыны ылла. Остуоруйа — алыптаах эйгэ. Дьиэ кэргэҥҥэ остуоруйа кэпсээн, сиэннэрин уран тылынан, дьикти сэһэнинэн умсугутар эбээ баара — дьол. Биһиги бүгүн дьоллоох сиэннэр тапталлаах эбэлэрин кытта саха норуотун остуоруйаларын астына, дуоһуйа иһиттибит.
Түмүккэ кыайыылаахтарынан Амма 1№-дээх оскуолатын 3 «в» кылааһын үөрэнээччилэрэ Симонова Лиза, Симонова Катя уонна Сивцев Витя эбэлэрэ Гуляева Любовь Прокопьевнаны кытта кыайыылааҕынан ааттаннылар.
Дьүүллүүр сүбэҕэ оскуолабыт бибилэтиэкэр — педагога Оксана Гаврильева, Арчы дьиэтин салайааччыта Василий Кочаткин, «Күөгэйээнэ» ансаамбыл кыттыылааҕа Оксана Прибылых үлэлээтилэр. Оскуолабыт ыытар тэрээһинигэр куруутун өйөбүл буолар бэтэрээн учууталбыт Анна Спиридоновна Брызгаева кыайыылаахтарга кинигэ бириис туруорда.
Виктория ДЬЯКОНОВА