Сахалыы сурук-бичик күнүгэр айар -тутар куттаах дьиэ кэргэннэргэ «Айар» кинигэ национальнай кыһата Өрөспүүбүлүкэбит үрдүнэн сыллата бэйэ оҥоһугун күрэҕин ыытар. Быйылгы күрэх С.А.Новгородов бастакы алфавита суруллубут букубаарыгар ананна.
Күрэҕи «Айар» национальнай кинигэ кыһатын кытары Саха сирин култууратын миниистэристибэтэ уонна духуобунай сайдыы киинэ тэрийэн ыытта. Барыта Саха сирин араас муннуктарыттан 64 дьиэ кэргэн кытынна. Манна Амма улууһун Амма Наахара нэһилиэгиттэн төрүттээх 4 саастаах, «Хатыҥчаана» уһуйаан иитиллээччитэ Мия Михайлова эбэтин Ульяна Дмитриевна, эһэтин Алексей Александрович Пахомовтары кытары фанераттан «Сахалыы сурук — бичик» чаһыыны оҥорон бастакы миэстэни ылла.
Кырачаан Мия букубаар чаһыыны дьоһуннаахтык туттан олорон кырааскалаан, холбука хомуйуутугар болҕомтолоохтук тутан — хабан, барытын ыйытан оҥоруста. Бастакы сиэн кыыс тарбаҕар талааннаах таптыыр дьонун эһэтэ Алексей туттар тэриллэрин бүтүннүүтүн дьаарыстаан, эбэтэ Ульяна кырааскалыыр киистэлэрин сууйарыгар — соторугар көмөлөстө. Түмүгэр наһаа минньигэс куолаһынан «Букубаар бэлэм!» — диэбитин саха куттаахтар сэргии, сиэн минньигэс сытын билбит дьон таптыы көрдөхтөрө буолуо.
Миябыт чуор куолаһынан хоһоон ааҕарын олус сөбүлүүр. Улуус, өрөспүүбүлүкэ күрэхтэригэр хаста да бастаабыта. Маны сэргэ кырачаан киһи уруһуйдуурун туохтан да ордорор. Күрэх кыайыылааҕа Мия Михайлова төрөппүттэрин курдук киэҥ -холку майгылаах, уус — уран тарбахтаах эбэлэрин эһэлэрин курдук барыга талааннаах, хос эбэтин курдук сатабыллаах, санаатын сөпкө сахалыы саҥарар кыыс оҕо бастыҥа буола улааттын.
Ирина КОРЯКИНА-ОЛЕСОВА