Саха сирин маҥнайгы бэрэсидьиэнэ М.Е. Николаев көҕулээһининэн тэриллибит «Рисуем все» бырайыак эстафетата Болугур нэһилиэгэр үс күн үлэлээтэ. Кэрэҕэ уһуйуу үлэтэ араас хайысханан уһуйааҥҥа, оскуолаҕа ыытылынна уонна бүтүн нэһилиэги хабар түмүктүүр тэрээһин буолла.
«Колосок» оҕо уһуйааныгар бу бырайыак чэрчитинэн араас хабааннаах тэрээһиннэр буолан аастылар. Ол курдук В.П. Ларионов аатын үйэтитэр «Ни дня без науки» диэн туһаайыллыбыт акцияҕа оҕолор «В мире красок и науки» диэн ааттаах быыстапкалара тэриллэн, төрөппүттэри уонна ыалдьыттары сэргэхситтэ. «Ньургуһун» бөлөх оҕолоро экология наукатын кытта билсэн «Амма уутун харыстаан» диэн уруһуйдара быыстапканы киэргэттилэр, онтон «Чуораанчык» бөлөх оҕолоро эмтээх оттору кырааскалаан үөрэттилэр. Кырачаан «Сардаана» бөлөх иитиллээччилэрэ ахсаан эйгэтин үөрэтэн бэһиэлэй сыыппаралары уруһуйдаатылар. «Рисуем все» бырайыак кубога уһуйааӊӊа «Сурук-бичик күнүгэр» олунньу 13 күнүгэр кэлэн, оҕолор төрүт тыл күнүн уруһуйу кытта дьүөрэлээн көрүстүлэр. Оҕолорго уонна педагогтарга уруһуй нөӊүө кэрэҕэ уһуйуу, төрөөбүт төрүт тылга тапталы, ытыктабылы иитэр сыаллаах үлэлэрэ ыытылынныннылар.
Е.Е. Пахомов аатынан Болугур орто оскуолатыгар алын сүһүөх кылаастарга «Сардаана сибэккини харыстыаҕыҥ» диэн акция, орто бөлөххө саха ойуулуур-дьүһүннүүр ускуустубатын сырдатыы бэсиэдэтэ буолла. Улахан кылаастарга саха эдэр худуоһунньуктарын үлэлэрин туһунан сырдатыы ыытылынна.
Олунньу 15 күнүгэр нэһилиэккэ «Кулун атах култуурата-өбүгэ быстыбат ситимэ» диэн кулун атах кэминээҕи олоҕу кэнчээри ыччакка, нэһилиэккэ билиһиннэрэр, үйэтитэр сыаллаах тэрээһиңңэ, дьукаахтыы сытар Амма-наахара ыалдьыттарын кыттыылаах улахан хабааннаах, сэргэх тэрээһин буолан ааста. Амма-Наахара нэһилиэгиттэн ыалдьыттыы 6 киһи кэлэн барда.
Тэрээһини Болугур библиотекатын үлэһитэ Наталья Софронова саҕалаата. Ол кэннэ уһуйаан иитиллээччилэрэ Константинов Арсений, Григорьева Алина, Николаев Ярослав, Филиппова Нарыйаана, Платонов Эрхан өбүгэ үгэһин билиһиннэрэр хоһооннору ааҕан тэрээһини киэргэттилэр. Киирии тылы баһылыгы солбуйааччы Софронова Раиса Николаевна эттэ, тэрээһини арыйда.
Бу тэрээһиҥҥэ «Кулун атах-өбүгэ быстыбат ситимэ» бырайыакка бүтүн нэһилиэк тэрилтэлэрэ көхтөөх кыттыыны ылан, бырйыак ис хоһоонун тиэрдэр уруһуйдарын бэлэмнээн, бу күҥҥэ түмүлүк буолан тиһилиннэ. Бары тэрилтэлэр олус дьиҥ ис хоһоонноох уруһуйдара дьон-сэргэ кэрэхсэбилигэр турдулар. Ону таһынан бу бырайыакка уһуйаан оҕолорун уруһуйдарынан «Кулун-атах култуурата» диэн билиһиннэрэр видео матырыйаал оҥоһуллан көһүннэ. «Кулун атах-өбүгэ быстыспат ситимэ» бырайыагы М.А. Ноговицын аатынан култуура киинин салайааччыта Ульяна Кузьмина дьоҥҥо-сэргэҕэ билиһиннэрдэ, бу бырайыакка култуура киинэ туох үлэни, ханнык тэрээһиннэри ыытарын билиһиннэрдэ.
Тэрээһин иккис чааһа Арассыыйаҕа 2024 сыл дьиэ кэргэн сылыгар ананан, «Дьиэ кэргэн – омук кэскилэ» диэн дьиэ кэргэнинэн уруһуй акцията буолла. Бу көрүҥү учуутал,ыраайы үөрэтээччи Пахомова Надежда Валерьевна иилээн-саҕалаан ыытта. Барыта тэрээһиҥҥэ 8 дьиэ кэргэн көхтөөхтүк кыттан, сэргэхсийэн, дуоһуйа уруһуйдаан үлэлээтилэр. Үлэ түмүгэр олус кэрэ, иллээх дьиэ кэргэн дьарыгын туоһулуур уруһуйдар кэрэхсэннилэр. Ону таһынан хас биирдии дьиэ кэргэн төлөппүөн уурар подставкатын киэргэтэн бэлэх ылан барда.
Кыттыыны ылбыт Николаева Лида, ПетровТулуйхан, Константинов Арсений, Саввина, Дайаана, Константинова Николь, Матвеева Сайаана, Баишева Ангелия, Мартынова Алина дьиэ кэргэттэригэр сэмэй бэлэхтэр, туоһу суруктар туттарылыннылар. Бу дьону түмэр сэргэх тэрээһин үрдүк таһымнаахтык ыытылынна. Тэрээһини баһылык солбуйааччыта Раиса Николаевна Софронова Амма Наахара баһылыгын солбуйааччытыгар Сахаяна Иннокентьевна Михайловнаҕа эстафета кубогын туттаран түмүктээтэ.
Бырайыакка кыттыыны ылбыт, тэрийсибит бары тэрилтэ салайааччыларыгар, М.А. Ноговицын аатынан култуура киинигэр, оскуола дириэктэрин эбээһинэһин толорор Филиппов Петр Михайловичка, нэһилиэк администрациятыгар, кыттыбыт төрөппүттэргэ, ыалдьыттарга, оҕолорбутугар, тэрийэр бөлөх-нэһилиэк дьаһалтатын, М. А. Ноговицын аатынан култуура дьиэтин, Болугурдааҕы библиотека, Пахомова Н. В., Тихонова А. П. ааттарыттан махталбытын тиэрдэбит.
Өрүү маннык көхтөөх, түмсүүлээх буолуоххайыҥ!
Анна ТИХОНОВА.