Саха сирин чулуу киһитэ, САССР, РСФСР, СССР үтүөлээх тренерэ Дмитрий Петрович Коркин 95 сааһыгар аналлаах норуоттар икки ардыларынааҕы таһымнаах үгүс тэрээьиннэр ыытыллыннылар уонна ыытылла тураллар. Биир дьон болҕомтотун тардыбыт тэрээһининэн Дьокуускай куоракка Дмитрий Петрович олоҕун, үлэтин, кини иитэн таһаарбыт олимпиецтарын, үрдүк спортивнай чыпчаалга тахсыбыт иитиллээччилэрин көрдөрөр «Куоркуннуу олоруохха, куоркуннуу айыахха» диэн дириҥ ис хоһоонноох быыстапка буолла. Быыстапка биир көрдөрүүтэ улуу тренер бастыҥ иитиллээччитигэр, Николай Захаровка-Сахааччаҕа ананна. Маны Амматааҕы Н.С. Захаров-Сахаачча аатынан оҕо спортивнай оскуолата туруорда.
“Амма улууһа Дмитрий Петрович Коркин биир бастыҥ иитиллээччитэ, сахалартан бастакынан көҥүл тустууга Олимпиаданы чарапчыланан көрдөрбүт, саха норуотун сүргэтин көтөхпүт, номох буолбут тустуук Николай Семенович Захаровка – Сахааччаҕа аналлаах быыстапка туруорда. Быыстапканы Н.Захаров – Сахаачча дьиэтин музейыттан Анна Семеновна Новгородова (Захарова) уонна Сахаачча аатын сугэр Амматааҕы оҕо спортивнай оскуолатын түмэлэ таҥан бэлэмнээтибит. Николай Захаров-Сахаачча кылгас эрээри, чаҕылхай олоҕун кэрэһэлиир быыстапка биир сүрүн миэстэҕэ тэнийэн турда, дьон сэҥээриитин ылла. Сахаачча ыраас уонна чаҕылхай тустуук уобараһын көрдөрөр хаартыскалардаах стендэлэр, бастакы грамотата уонна кубога, тутта сылдьыбыт мала, кэтэ сылдьыбыт теннискэтэ, Сахааччаҕа анаммыт кинигэлэр, альбом, табаарыһа Вячеслав Карповтыын суруйсубут суруктара, портреттара, статуэткалара, норуот маастара Валентина Стручкова испииссэнэн баайбыт паннота уо.д.а экспонаттар дьон болҕомтотун тартылар.
Быыстапка балаҕан ыйын 5 күнүттэн 14 күнүгэр диэри турда. Ол кэм иһигэр быыстапка саалатыгар кинигэ сүрэхтэниитэ, научнай – практическай конференция уонна да атын тэрээһиннэр ыытылыннылар. Барыта 1216 көрөөччү сырытта, билиилэрин хаҥаттылар, сэргээтилэр. Быыстапка турбут кэмигэр кэлбит дьону Николай Семенович Захаров-Сахаачча балтыта Анна Семеновна уонна Амматааҕы ДЮСШ тренердэрэ, инструктор – методист көрүстүлэр, экспонаттары кытта билиһиннэрдилэр. Амма улууһа быйыл ахсынньы ыйга Николай Семенович Захаров-Сахаачча 75 сааһын бэлиэтиир тэрээһиннэргэ бэлэмнэнэр. Улуу тустуук аата үйэлэргэ ааттанна турдун”, — диэн Амматааҕы оҕо спортивнай оскуола иһинэн түмэл салайааччыта Виктория Владимирова сырдатта.
Ааптар: “Амма олоҕо” хаһыат
