Амма улууһугар аан бастакытын сахалыы тылынан «Барҕарыы» научнай-практическай кэмпириэнсийэ 7-11 кылаас үөрэнээччилэрин икки ардыларыгар ыытылынна. Тэрээһин «Барҕарыы» пуонда СӨ Үөрэҕириигэ уонна наукаҕа министиэристибэтин быһаччы өйөбүлүнэн уонна Амматааҕы үөрэх салалтатын көҕүлээһининэн барда.
Амма нэһилиэгэр үгүс оскуолаларга карантин биллэриллэн, конференция кэтэхтэн ыытылынна. Кэмпириэнсийэ сүрүн сыалынан-соругунан чинчийэр үлэ нөҥүө оҕо айар, ырытар, анаарар дьоҕурун, сахалыы саҥарар-толкуйдуур сатабылын сайыннарыы буолла. Абаҕаттан, Амма Наахараттан, Чакыртан, Бөтүҥтэн, Эмистэн, Соморсунтан, Сатаҕайтан уонна Амматааҕы лиссиэйтэн уопсайа 41 оҕо 8 сиэксийэнэн кытыннылар. Оттон үөрэнээччилэр үлэлэрин 16 экспиэрт сыаналаатылар. Кэмпириэнсийэ түмүгүнэн бастакы миэстэни «История» хайысхатыгар Захарова Айта, Петрова Сайаана (Эмис орто оскуолата), «Култуура уонна искусство» хайысхатыгар Максимова Уйгулаана (Чакыр орто оскуолата), «Педагогика уонна уйулҕа билимэ» xайысхаҕа Сергеева Виолетта ( Бөтүҥ орто оскуолата), «Кыраайы үөрэтии, айылҕаны харыстааһын» xайысхаҕа Давыдова Сардаана (Амма лиссиэйэ), «Математика» хайысхатыгар Колесов Айал (Абаҕа орто оскуолата), «Мэдиссиинэ» xайысхатыгар Романов Мирослав (Амма Наахара орто оскуолата), «Экономика, бэйэ оҥорон таһаарыыта» хайысхаҕа Колесова Аделина (Абаҕа орто оскуолата), «Тыл үөрэҕэ» xайысхаҕа Максимова Валя (Чакыр орто оскуолата) ыллылар. Маны сэргэ, иккис миэстэҕэ 6 оҕо, үһүс миэстэҕэ 5 оҕо таҕыста, биһирэбил сурукка 7 оҕо тигистэ. Кыайыылаахтар анал грамоталарынан уонна «Барҕарыы» национальнай пуондаттан сыаналаах бириистэринэн наҕараадаланнылар. Кэмпириэнсийэни тэрийбит хамыыһыйа чилиэттэрэ уонна улуустааҕы үөрэх салалтата пуонда үлэһиттэригэр махтал тылларын тиэрдэллэр. Салгыы кыайыылаахтар үүнэр сыл олунньу ыйыгар өрөспүүбүлүкэтээҕи түһүмэххэ, Дьокуускай куоракка улуустарын чиэһин көмүскүү барыахтара.
Наталия РЯЗАНСКАЯ.