Амма улууһун дэлэгээссийэтэ Санкт Петербург куоракка Улуу Бүөтүр аатынан антропология уонна этнография түмэлин (Кунсткамера) научнай бибилэтиэкэтин саалатыгар кинигэ сүрэхтэниигэр кытынна. Бу уһулуччулаах этнограф, биир дойдулаахпыт Виктор Васильев хомуйан оҥорон баран бэчээккэ тахсыбакка сыппыт үлэлэрин түмэр “Научные труды, экспедиционная деятельность и музейные коллекции по Сибири, Северу, и Дальнему Востоку” (сост. А.Н. Ефремов) диэн кинигэ быйыл сайын Олоҥхо ыһыаҕын көрсө тахсыбыта.
Санкт Петербург курдук ыраах, хотугу столицаҕа ыытыллыбыт сүрэхтэниигэ Амматтан улуус дьокутааттарын Сэбиэтин бэрэссэдээтэлэ Владимир Колосов, култуура уонна норуот айымньытын управлениетын салайааччыта Иван Федоров уонна А.А. Черемных аатынан оҕо ускуустубатын оскуолатын преподаватэлэ, кинигэни хомуйан оҥорууга үлэлээбит, искусствоведение билимин кандидата Виктория Григорьева кытыннылар. Маны сэргэ Виктор Васильев үлэтин сүгүрүйээччилэрэ, интэриэһиргээччилэр Амматтан, Дьокуускайтан, Москваттан куйаар ситиминэн холбонон санааларын үллэһиннилэр. Ол курдук Амматтан улуус баһылыгын социальнай боппуруостарга солбуйааччы Ньургуйаана Илларионова, улуус түмэлин дириэктэрэ Айантай Байдам, муниципальнай архыып сэбиэдиссэйэ Катерина Окорокова, улуус култуураҕа уонна норуот айымньытыгар управлениетын үлэһиттэрэ. Кинигэҕэ этнограф биографията, научнай ыстатыйалара, хомуйбут коллекциятын хаартыскалара, Эдуард Пекарскайы кытта суруйсуулара уонна Хоту дойду норуоттарын үгэстэрэ киирбиттэрэ. Кинигэни кытта санаа атастаһыытын модераторынан историческай билим кандидата, Кунсткамера научнай сотруднига Николай Гончаров салайан ыытта.
“Кинигэ сүрэхтэниитин Санкт Петербурга ыытар туһунан историческай наука доктора, кинигэ эппиэттиир эрэдээктэрэ Екатерина Назаровна Романова көҕүлээбитэ. Ол тэрээһин олус үчүгэйдик ааста. Екатерина Назаровна бэйэтэ куйаар ситиминэн кытынна. Манна кэлии тэрээһин үлэлэрин балаҕан ыйыттан саҕалаан улуус баһылыгын социальнай боппуруоска солбуйааччы Ньургуйаана Ивановна Илларионова уонна Кунсткамера дириэктэрин научнай үлэтигэр солбуйааччы Владимир Николаевич Давыдов ыыппыттара. Манна кэлэрбитигэр түмэл ааҕар саалатыгар бэлэх быһыытынан тахсыбыт кинигэни уонна 1906 сыллаахха биир дойдулаахпыт, этнограф, фольклорист, аан дойду таһымнаах чинчийээччи Виктор Николаевич Васильев суруйан хаалларбыт 4 олоҥхо кинигэлэрин аҕалбыппыт. Көрсүһүүнү тэрийэн ыыппыт Николай Сергеевич Гончаровы кытта 2027 сылга Виктор Николаевич төрөөбүтэ 150 сылыгар анаан ыытыллыахтаах үлэ былааннарын торумнаатыбыт. Бу бэлиэ датаҕа олус улахан үлэ барыахтаах. Манна өссө атын регионнар, холобура Тува өрөспүүбүлүкэтэ кыттыһарын биллэрбитэ үөрүүлээх. Виктор Николаевич бэйэтин хонууга үлэлэрин Арассыыйа араас муннуктарыгар ыыппыта. Ол үлэтин түмүгүнэн петербургскай этнография бары ирдэбиллэригэр эппиэттиир гына оҥоһуллубут бэрт сыаналаах үлэлэри хаалларбыта. Маны таһынан чинчийэр гуманитарнай институтка Виктор Васильев «Тунгусы Алдано-Майского и Аяно-Охотского районов» диэн төрдүс кинигэтэ сүрэхтэннэ. Кинигэни хомуйан оҥорууга эппиэттээх Сардана Анатольевна Алексеева “Васильев стал не только спасителем, но и покорителем» исторической этнографии” диэн бэлиэтээн эттэ. Онтон Вячеслав Иванович Шадрин кинигэни эбээннэр уонна эбэҥкилэр историяларын уонна олохторун энциклопедията диэн ааттаата. Манна өссө биһиги тэрээһиммитигэр Санкт Петербурга олорор биир дойдулаахпыт, профессор, филогическай билим доктора Александр Александрович Петров күүс-көмө буолбутун бэлиэтээн махтанан этиэм этэ. Онон киэн туттар биир дойдулаахпыт үбүлүөйдээх сааһын көрсө өссө да иннибитигэр улахан үлэ күүтэр”, — диэн Виктория Григорьева санаатын үллэһиннэ.
Сүрэхтэниигэ санааларын эппит түмэл үлэһиттэрэ Виктор Николаевич научнай экспедициятыттан аҕалбыт экспонаттара олус үчүгэйдик хараллан сыталларын, бэл диэтэр блокада кэмигэр кинилэр сүтэн-оһон хаалбакка, билигин да туруктара үчүгэйдэрин эппиттэрин истэн киһи сөҕөр уонна махтайар. Бу буоллаҕа наука үлэһиттэрэ сыранан булуллубут экспонаттарга, үлэлэргэ бэриниилээх сыһыаннара. Түмүк тылы эппит улуус култуураҕа уонна норуот айымньытыгар управлениетын начальнига Иван Иванов 2027 сылга, Виктор Васильев үбүлүөйдээх сылыгар, түмэл көһө сылдьар быыстапканы Саха сиригэр аҕалара буоллар диэн баҕа санаатын тириэртэ. Дьэ чахчы да бу этии олоххо киирдэр биир дойдулаахпыт хомуйбут үлэлэрин көрөр дьоллонуо эбиппит.
«Амма олоҕо» хаһыат