Сүөһү кыстыгы этэҥҥэ туорууругар, үүтү да биэриитигэр эбии аһылык олус наадалаах. Улуус үрдүнэн быйыл эбии аһылык былаанын толорор эрэллээхтэр. Константин Фомин баһылыктаах “Сэргэ Бэс” хаһаайыстыба сенажка былаанын бу күннэргэ толордо.
Бу күннэргэ кураан күннэри былдьаһа ходуһаларга, бааһыналарга күүстээх үлэ барар. Тыа сирин олохтоохторо хороҕор муостаахтарын, сыспай сиэллээхтэрин тото-хана кыстатар иннигэр оттоон үлүмнэһэллэр, эбии аһылык бэлэмнииллэр. Улуус үрдүнэн сенажка былаан 1300 тонна, сиилэскэ -1900 тонна. Бүтэһик субуокканан көрдөххө, сенажка былаан 30,8, онтон сиилэскэ – 65, 79 бырыһыан туолла. Сэргэ Бэскэ баар Константин Фомин баһылыктаах бааһынай хаһаайыстыба сенажка былаанын 100 бырыһыан толордо. Ол эбэтэр 10 гаттан 100 тонна сенаһы бэлэмнээтэ.
Ааптар: “Амма олоҕо” хаһыат