Соморсун нэһилиэгин эр дьоно ааспыт Аҕа дойдуну көмүскээччилэр күннэрин чэрчитинэн мындырдарын, бэргэннэрин, сымсаларын, хорсуннарын тургутустулар. Сыл ахсын ыытыллар, быйыл үһүс төгүлүн буолар эр дьоҥҥо биэс көрүҥҥэ: сыал ытыыга, дартска, теннискэ, дуобакка, баарыска нэдиэлэ устата күрэхтэстилэр.
Уопсайа 17 эр бэртэрэ кытынна. Эр биир киирсиилэр түмүктэринэн ытыыга Афанасий Караканов, дартска Дьулустан Караканов, теннискэ Алексей Кононов, дуобакка Николай Кононов, баарыска Алексей Кононов бастаан таҕыстылар. Оттон кылаан кыайыылаҕынан Дьулустан Караканов, иккис Николай Кононов, үһүс Алексей Кононов буоллулар.
Биэс көрүҥ түмүгүнэн кыайыылаахтар улахан бириистэри туттулар.1 миэстэ — убаһа аҥара, 2 миэстэ — убаһа чиэппэрэ, 3 миэстэ — убаһа чиэппэрэ, 4 миэстэ — 5000 солк. уу харчынан, 5 миэстэ 5000 солк. уу харчынан наҕараадаланылар. Төрдүс миэстэлээх Михаил Протопопов, бэһис миэстэлээх Василий Нестерев, алтыс миэстэҕэ тыхсыбыт эдэр аҕа Айуран Максимов спонсордартан бириистэри туттулар. Бэтэрээннэргэ үчүгэй көрдөрүүнү ситиспит Иннокентий Лебедев убаһа иһинэн бэлиэтэннэ.
Биэс көрүҥ күрэх төрүттээччитэ, сүрүн судьуйата, спорт бэтэрээнэ, СахаВА бочуоттаах маастара Нестерев Василий Романович убаһа уонна биир дойдулаахпыт, Дьокуускай куоракка Соморсун түмсүүтүн биир тутаах киһитэ, убайбыт Старостин Дмитрий Спиридонович харчынан бириистэри туруордулар.
Бу күрэхтэһии нэһилиэкпитигэр төһө даҕаны спортивнай саалата суох буолларбыт, эр дьону спорка көҕүлүүр сыаллаах спорт испсэлииһэ Михаил Степанов бырайыагынан үһүс сылын ыытыллар. Түгэнинэн туһанан тэрээһиҥҥэ көмөлөспүт бары дьоммугар махталын тиэрдэр.
Надежда Белолюбская.