Соморсуннааҕы “Чэчир” уһуйааҥҥа улуус иитээччилэрэ түмсэннэр “Чэчиртэн ыллыктанар чөмчүүк саас олоҥхото” диэн семинары ыыттылар. Семинар уһуйаан 65 сыллаах үбүлүөйүгэр, улууска биллэриллибит Олоҥхо сылыгар уонна Олоҥхо дэкээдэтигэр ананна.
“Соморсун нэһилиэгин Саргылана Николаевна Данилова салайааччылаах «Чэчир» оҕо сайдар киинигэр дьоһун түһүлгэ тэнийдэ. Бу күн уһуйаан кэлэктиибэ оҕону иитэр-үөрэтэр үлэлэригэр олоҥхо педагогикатын дьүөрэлээбит үлэлэрин- хамнастарын чөкөлөөн, чөмчөтөн бэчээттэтэн таһаарбыт «Чэчиртэн ыллыктанар чөмчүүк саас олоҥхото» диэн үөрэтэр-мэтэдиичэскэй босуобуйаларын сүрэхтээтилэр. Кинигэни эрэдээксийэлииргэ көмөлөспүт Татьяна Петровна Павлова бэлиэтээбитинэн, босуобуйа улахан тапталынан бэлэмнэммит, бары өттүнэн ааҕааччыларын сэҥээритин ылыан сөптөөх, туһалаах босуобуйа буолбут. Босуобуйа 351 страницалаах, 100 экземплярынан таҕыста. Онон бу саҥа тахсыбыт босуобуйа биһиги уһуйааннарбытыгар улахан көмөлөөх буолуо диэн эрэнэбит. Семинар иккис чааһыгар улуус бары уһуйааннарыттан кыттааччылар, кустовой мэтэдиичэскэй түмсүүлэрин хамаандалара, «Олоҥхо олугунан» диэн күрэххэ илин- кэлин түһүстүлэр, үлэлэрин уопутун тарҕаттылар. Түмүккэ Чапчылҕан, Бөтүҥ, Абаҕа нэһилиэктэрин уһуйааннарын “Саһарҕа- 2” холбоһуктаах хамаандалара үһүс, Алтан, Сатаҕай, Эмис уһуйааннарын “Чөмчүүк” хамаандалара — иккис миэстэ уонна муҥуутуур кыайыылааҕынан Амма нэһилиэгин “Саһарҕа” -1 хамаандата буоллулар. Тэрээһин оһуохайынан түмүктэннэ. Ити курдук уһуйааннар Олоҥхо декадатын арыйдылар”, — диэн улуустааҕы үөрэх салаатын уопсай үөрэхтээһини методическай арыаллааһын салаатын сүрүн исписэлииһэ Эмма Давыдова сырдатта.
Кинигэ сүрэхтэммитин туоһулуур аалай лиэнтэни уһуйаан бэтэрээнэ Анна Лебедева, эрэдээктэр Татьяна Павлова, уһуйаан сэбиэдиссэйэ Саргылана Данилова уонна улуус үөрэҕин салалтатын сүрүн исписэлииһэ Эмма Давыдова быстылар.
Бу күн уһуйаан кэлэктиибигэр Соморсун нэһилиэгин баһылыгын солбуйааччы Надежда Белолюбская, улуус үөрэхтээһинин салалтатыттан Эмма Давыдова, Клара Кириллина, А.П. Рязанскай аатынан Соморсун орто оскуолатын дириэктэрэ Николай Андросов, уһуйаан бэтэрээнэ, 40-тан тахса сыл уһуйааны салайбыт Анна Лебедева эҕэрдэлэрин, баҕа санааларын тириэртилэр.
“Амма олоҕо” хаһыат