Соморсун нэһилиэгэ бөһүөлэги тупсаран оҥоруу бырайыактарынан судаарыстыбаннай бырагыраамаларга куруук көхтөөхтүк кыттар. Быйыл мини-парк бырайыагынан олохтоох көҕүлээһиннэри өйүүр бырагыраамаҕа кыттар.
Ол курдук, 2016 сыллаахха СӨ тыатын хаһаайыстыбатын министиэристибэтин “Тыа сирин тупсаран оҥоруу” программатын нөҥүө “Дьол биһигэ” ийэ уонна оҕо скверэ, 2020 с. СӨ “Үүнэр көлүөнэ фондата” ыытар күрэҕэр кыайан Оҕо былаһаакката, СӨ үбүн министиэристибэтэ ыытар олохтоохтор көҕүлээһиннэрин өйүүр программанан 2021 сылга “Албан аат” болуоссата саҥардыллыбыта, 2022 с. нэһилиэк историческай пааматынньыктарын ситимниир “Сэһэн сквер” олоххо киирбитэ.
Быйылгы сылга нэһилиэк дьаһалтата, олохтоохтор өйөөһүннэринэн, “Уһук илин дьиэлэр олбуордарын тупсарыы” (“Благоустройство дальнесвосточных довров”) бырагыраамаҕа киирсэн, Михайловка бөһүөлэгин Лонгинов улуусса 43/1 нүөмэрдээх элбэх квартиралаах дьиэтин таһыгар олохтоохтор сынньанар, чэбдигирдэр сирдэрэ буолар элбэх хайысхалаах мини-парк бырайыагынан бу күрэххэ кыттар. Парк нэһилиэк олохтоохторо оҕотуттан кырдьаҕаһыгар тиийэ сөбүлээн сынньанар, эттэрин-хааннарын сайыннарар сиринэн буолуо.
Маны тэҥэ доруобуйаларынан хаарчахтаах дьоҥҥо анал тренажердар, олорон эрэ остуол оонньууларынан оонньуур зоналар баар буолуохтара.
Уопсай дьиэ олохтооҕо нэһилиэк общественнай олоҕун көхтөөх кыттааччыта Ольга Заборовская бырайыак туһунан санаатын үллэстэр.
— Биһиги, бу дьиэ олохтоохторо, Хаарбах дьиэлэри көһөрүү бырагырааманан Амма улууһун нэһилиэктэригэр бастакынан, 2021 сыллаахха саҥа таас дьиэҕэ киирбиппит. Манна барыта 14 квартираҕа 30-ча киһи олоробут. Бу саҥа дьиэбит таһын ситэрэр мини-парк бырайыагын уопсай мунньахха истэн-билэн олус сэҥээрдим. Биһиги кэргэмминээн иккиэн доруобуйабытынан хааччахтаах дьоммут. Маннык дьиэбит таһыгар, чугастыы чэбдигирдэр, күүлэйдиир, сынньанар сир баар буоларыттан үөрэбит, сэргэхсийэммит олохпут уһуо этэ.
Надежда Белолюбская.