Соморсун эр дьоно Үлэ сылынан, үлэнэн албан ааттаммыт ытык киһилэрин дьоһун үбүлүөйүгэр анаан, «Үлэ күүһэ” күрэххэ күргүөмүнэн кытыннылар.
Соморсун нэһилиэгигэр, сэтинньи ый 14 күнүгэр, Саха Республикатыгар Үлэ сылынан, Саха народнай суруйааччыта, биллэр общественнай, государственнай деятель Дмитрий Федосеевич Наумов үбүлүөйдээх тэрээһиннэрин чэрчитинэн «Үлэ күүһэ» муус ылыытыгар тэрилтэлэр икки ардыларыгар күрэх буолан ааста.
Бу күрэххэ Соморсун орто оскуолатыттан, олохтоох дьаһалтаттан, баһаарынай чаас үлэһиттэрэ, ОДьКХ эр дьоно, барыта 6-лыы киһилээх эр дьон хамаандата күрэххэ кытыннылар.
Бу күрэх сүрүн сыалынан биһиги аҕа саастаах дьоммутугар, байыаннай дьайыыга кытта сылдьар хорсун дьоммут дьиэ кэргэттэригэр, аҥардас ийэлэргэ көмө оҥорон муус ылан биэрии буолар.
Күрэх усулуобуйатынан 1:30 чаас бириэмэ төһө улахан мээрэйдээх чардаат тахсыбытынан, Үлэ түмүгэ билиннэ. Күрэхтэһии түмүгүнэн А.П. Рязанскай аатынан орто оскуола коллектива бастаата, иккис баһаарынай чаас байыастара, үһүскэ олохтоох дьаһалта иһинэн баар тэрилтэ үлэһиттэрэ, төрдүскэ олох-дьаһах хаһаайыстыбатын үлэһиттэрэ таҕыстылар. Кыайбыт хамаандалар олохтоох дьаһалта, биирдиилээн спонсордар туруорбут бириистэринэн наҕараадаланнылар.
Бары күрэххэ кыттыбыт, тэрийсибит дьоммутугар истиҥ махталбытын тиэрдэбит!
Нарыйа Федорова.