Саха сирин олохтоохторо, ол иһигэр аммалар, бука бары киин тэлэбиидэнньэни долгуйа көрдүбүт. Курскай Дугаҕа таанканан кыргыһыы 80 сылыгар анаммыт үөрүүлээх тэрээһиҥҥэ Дойдубут Бэрэсидьиэнэ Владимир Путин хорсун быһыыны көрдөрбүт “Алеша” диэн ааттаах танка экипаһыгар тус бэйэтэ Герой Сулуһун туттарда. Кинилэр истэригэр икки саха сэмэй уолаттара бааллар. Онон Саха сирин бука бары олохтоохторо бу үөрүүлээх түгэни олус долгуйа көрдүлэр. Амма улууһун баһылыга Степан Кузьмин эмиэ бу түгэни көрө олорон долгуйбутун, кини түөһүн киэн туттуу иэйиитэ кууспутун этэр.
“Мин бэйэм бу үөрүүлээх түгэни бэркэ долгуйан олорон көрбүтүм. Саха уолаттара чахчыта хайдах курдук хорсун быһыыны көрдөрдүлэр! Кинилэри биһиги эрэ буолбакка Арассыыйа, ону ааһан аан дойду барыта кэтээн көрдө уонна сөхтө. Бэйэм анал байыаннай дьайыы зонатыгар бара сылдьыбытым. Онно биһиги биир дойдулаахтарбыт бука бары хорсуннук ытык иэстэрин толоро сылдьалларын эт харахпынан көрөн, кэпсэтэн кэлбитим. Уус Алдан ыччата Алексей Неустроев уонна Сунтаар чулуу уола Филипп Евсеев ылбыт сулустара – бу билигин инники кирбиигэ сылдьар уолаттар барыларын сулустара буолар. Мин санаабар онно сылдьар уолаттар бары геройдар. Кинилэр бэйэлэрин мындыр өйдөрүнэн, сатабылларынан, олоххо көрүүлэринэн анал байыаннай дьайыыга куруутун холобурга сылдьаллар. Алексей уонна Филипп биһиги киэн туттар чулуу уолаттарбыт буолаллар. Кинилэр бары саха саллааттарын эр санааларын көрдөрөллөр. Махтаныам этэ геройдары иитэн таһаарбыт төрөппүттэригэр, учууталларыгар уонна биир дойдулаахтарыгар”, — диэн Степан Николаевич санаатын тириэртэ.
Ааптар: “Амма олоҕо” хаһыат
