И.И. Константинов-Дэлэгээт Уйбаан аатынан Сулҕаччы орто оскуолатын үөрэнээччилэрэ Саша Крюков, Дамир Капитонов Суздаль куоракка ыытыллыбыт Бүтүн Россиятааҕы эдэр мадьынылар улахан түһүлгэлэригэр кыттан, улахан кыайыыны ситистилэр.
Ол курдук, Саша 2-с миэстэ, Дамир 3-с миэстэ буолан чугас дьоннорун, табаарыстарын, биир дойдулаахтарын муҥура суох үөртүлэр. Саша Крюков 14-15 саастаахтарга, 80 киилэттэн үөһэ ыйааһыннаахтарга кииристэ. Күрэххэ кинини тренердэрэ Сулҕаччы орто оскуолатыттан учуутала Андрей Иннокентьевич Варламов уонна Амма улууһун старшай тренерэ Афанасий Афанасьевич Владимиров илдьэ сырыттылар. Саша өссө биир тренерэ — Степан Поликарпович Сутаков.
Ыраах сиргэ, Москва анараа өттүгэр сытар нуучча баай историялаах былыргы куоратыгар Суздальга айан бэрт уһун уонна ороскуоттаах. Маныаха Сашаҕа спонсорскай көмөнү оҥорон, эдэр, кэскиллээх урбаанньыппыт Фомин Александр Константинович барар-кэлэр ороскуотун уйунна. Сыһыаран эттэххэ, Александр Фомин биһиги депутаппыт. Кини нэһилиэккэ үгүс быһаарыллыбат түгэннэргэ, тэрээһиннэргэ көмө оҥорон, бар-дьон махталын ылыан-ылар эдэр киһибит.
Дамир Капитонов 12-13 саастаахтарга 70 киилэттэн үөһээ ыйааһыҥҥа киирсэн, 3-с миэстэ буолла. Кини Саха республикатын сүүмэрдэммит хамаандатыгар киирсэн барбыта.
Уолаттарбыт иккиэн улахан ситиһиилээх, «илии тутуурдаах, өттүк харалаах» киэҥ сиртэн иһэллэр. Онтон дойдуларыгар кинилэри төрөппүттэрэ, доҕотторо, үөрэнэр оскуолалара, биир дойдулаахтара күүтэллэр.
Елена ПОПОВА.