И.И. Константинов — Дэлэгээт Уйбаан аатынан Сулҕаччы орто оскуолатыгар Аҕа дойдуну көмүскээччилэр күннэригэр аналлаах байыаннай-патриотическай үлэҕэ араас дьаһаллар ыытыллаллар.
Ол курдук, оскуола музейыгар Ийэ дойдуларын көмүскүүр ытык иэстэрин толорон анал байыанннай дьайыыга кытта сылдьар Сулҕаччы оскуолатын үөрэнэн бүтэрбит тоҕус уолга анаан стендэ аһыллыыта буолла. Үөрүүлээх тэрээһиҥҥэ нэһилиэк баһылыга Артем Германович Степанов, оскуола дириэктэрэ Иван Григорьевич Окороков, иитэр үлэҕэ дириэктэри солбуйааччы Аграфена Семеновна Данилова, түмэл салайааччыта Екатерина Петровна Михайлова уонна хорсун-хоодуот санаалаах ыччаттарбыт чугас дьонноро Оксана Ивановна Неустроева, Александра Михайловна Кириллина кыттыыны ыллылар уонна саллаат уолаттар үөрэхтэрин, олохторун истиҥник сырдаттылар.
Олус кэрэхсэбиллээх тэрээһин үүнэр ыччакка патриотическай тыыны иитиигэ тирэх буолара саарбахтаммат.
Елена Попова.