Улуу Кыайыы 80 сылын көрсө өрөспүүбүлүкэтээҕи «Бары бииргэ Кыайыыга» девизтээх «Кыайыы Знамята» эстэпиэтэ Сулҕаччы нэһилиэгэр кэллэ. Саха народнай артыыһа Христофор Максимов аатынан культура уонна сынньалаҥ киинин саалатыгар дьон толору мустубута киһини үөрдэр: тыыл уонна үлэ бэтэрээннэрэ, бойобуой дьайыылар кыттыылаахтара, Сулҕаччы уонна Сэргэ-Бэс оскуолаларын үөрэнээччилэрэ, олохтоохтор.
Кыайыы Знамятын Амма улууһун баһылыгын солбуйааччы Ньургуяна Илларионова, Амма улууһун бэтэрээннэрин Сэбиэтин бэрэссэдээтэлэ Мария Захарова, «Юнармия» хамсааһын улуустааҕы ыстаабын салайааччыта Петр Попов Знамяны арыаллаан аҕаллылар.
Тэрээһин өрөгөй чааһыгар Кыайыы Кыһыл Знамятын И.И. Константинов-Дэлэгээт Уйбаан аатынан Сулҕаччы орто оскуолатын 11-с кылааһын үөрэнээччилэрэ, Ил Дархан Харыйатын кыттыылааҕа, туйгун үөрэнээччи Максим Максимов, улуустааҕы «Эдэр дипломат» күрэх кыайыылааҕа Айхал Слепцов, Бүтүн Россиятааҕы ГТО хамсааһынын призера Айсен Данилов, улуустааҕы предметнэй олимпиадалар призердара Федя Степанов киллэрэн Сулҕаччы нэһилиэгин баһылыга Артем Степановка туттардылар.
Үөрүүлээх чааска эҕэрдэ тылы Сулҕаччы нэһилиэгин баһылыга Артем Степанов, Амма улууһун муниципальнай оройуон баһылыгын солбуйааччы Ньургуяна Илларионова, Амма улууһун ветераннарын сэбиэтин бэрэссэдээтэлэ Мария Захарова тириэртилэр. Харда тылы бойобуой дьайыылар кыттыылаахтара, «Хорсунун иһин» мэтээл кавалера Николай Неустроев, тыыл бэтэрээнэ, СӨ тыа хаһаайыстыбатын бочуоттаах бэтэрээнэ, нэһилиэк бочуоттаах олохтооҕо, 92 саастаах ытык кырдьаҕас Елена Рязанская эттилэр. Кыайыы Знамятын эстэпиэтэтин көрсүү хамсааһын историятыттан нэһилиэк бэтэрээннэрин сэбиэтин бэрэссэдээтэлэ Елена Попова кылгастык билиһиннэрдэ.
Өйгө хатанар, бэрт истиҥ тэрээһини ырыанан Сэргэ-Бэстээҕи кулууп иһинэн үлэлиир «Туйаара» вокальнай ансамбль уонна кырачаан, кэскиллээх ырыаһыт Ян Слепцов киэргэттилэр. «Туйааралар» биир дойдулаахпыт, сэрии тулаайаҕа, биллиилээх мелодист, баянист, ССРС культуратын туйгуна Анатолий Слепцов матыыбыгар, Уйбаан Бөтүүнскэй хоһоонугар «Улуу Кыайыы туһунан баллада» ырыаны толорон үөрүүлээх түгэни астылар уонна уостан түспэт «Тыыннаахтар умнубат сыллара» ырыанан саалга мустубут дьону кытта бииргэ туран ыллаан, өрөгөй чааһа түмүктэннэ. Салгыы өйтөн түспэт бэлиэ түгэни историяҕа тиһэн, өйдүү-саныы сылдьар гына хаартыскаҕа түһэн, видеоҕа уһулан, Кыайыы Кыһыл Знамятын көрсүү сэргэх тэрээһинэ өрө көтөҕүллүүлээхтик түмүктэннэ.
Елена ПОПОВА.