Тохсунньу 14 күнүгэр Алтан-Сатаҕай-Эмис нэһилиэктэрин икки ардыларыгар үгэскэ кубулуйбут дуобакка күрэх буолла. 19-с төгүлүн ыытыллар дуобат дьиктилээх хонуута Сатаҕай нэһилиэгин түөлбэтигэр дьону-сэргэни түмтэ. Күрэхтэһиини Сатаҕай нэһилиэгин олохтоох дьаһалтата, “Айыллык” норуот айымньытын дьиэтин кэлэктиибэ, спортинструктор Гаврил Орлов олус сэргэхтик тэрийэн ыыттылар. Хамаанда састаабыгар балаһыанньа быһыытынан баһылык эбэтэр баһылык солбуйааччыта, ыччат лидерэ, спортинструктор, биир дьиэ-кэргэн (эбэ, эһэ, ийэ, аҕа, оҕо), сүһүөхтэринэн оскуола саастаах 3 кыыс, 3 уол, 5 эр киһи, 4 дьахтар кытыннылар. Ол курдук барыта 23 дуоскаҕа хамаандалар утарыта оонньоотулар.
Дьиэ-кэргэнинэн дуобакка Эмистэн Екатерина Захарова дьиэ кэргэнэ бастакы миэстэ, иккис миэстэ Сатаҕай нэһилиэгин олохтоохторо Анастасия Николаевна уонна Олег Петрович Лукиннар дьиэ-кэргэттэрэ буоллулар, үһүскэ Алтантан Анна уонна Михаил Алексеевтар дьиэ кэргэттэрэ олус үчүгэйдик оонньоотулар. Дьиэ-кэргэттэр бары мэтээлинэн, дипломунан уонна бирииһинэн наҕараадаланнылар. Педагог уонна наставник, бэтэрээн учуутал Анастасия Николаевна Лукина дуобаты көҕүлээн кырачаан дуобатчыттарга бэйэтин бирииһин туттарда. Түмүккэ нэһилиэк дьаһалтата туруорбут көһөрүллэ сылдьар Кубогын уонна 3000 харчынан сертификатын Эмис нэһилиэгин хамаандата кыайыыны ситиһэн ылла. Иккис миэстэҕэ Сатаҕай нэһилиэгэ буолла уонна 2500 харчынан сертификаты тутта. 3-с миэстэни ылбыт Алтан нэһилиэгин хамаандата 2000 суммалаах сертификатынан туһааннаах дипломунан наҕараадаланна. Кыайыылаахтар бары түөстэригэр мэтээл кэтэн, диплом тутан тарҕастылар.
Дуобаты көҕүлүүр бэтэрээннэрбитигэр Алтантан Александр Стручковка уонна Эмистэн Алексей Гаврильевка спортинструктор Гаврил Орлов махталын биллэрэн туран бэйэтэ олохтообут анал бирииһин туттарда. Ону сэргэ “Саамай эдэр оонньооччу” анал ааты Эмистэн 7 саастаах Дьулусхан Иванов уонна “Саамай саастаах оонньооччу” аатын 77-с хаарыгар сылдьар Лидия Матвеевна Егорова ыллылар уонна өйдөбүнньүк бэлэҕи тутан үөрдүлэр.
Кэлбит ыалдьыттары “Сайдыы” маҕаһыын үлэһиттэрэ уонна Марина Максимова минньигэс астарынан көрсөн, кыттааччылар махтанан, тэрээһини астынан “Эһиил, 2025 сылга үбүлүөйдээх 20-с төгүлүн ыытыллар дуобат хонуутугар көрсүөхпүт” диэн тарҕастылар.
Христина СКРЯБИНА