Сулҕаччы нэһилиэгэр Төрөөбүт тыл уонна сурук-бичик нэдиэлэтэ бэрт сэргэхтик ыытылла турар. Араас тэрээһиннэр оҕотуттан эмэнигэр тиийэ барыбытым түмтүлэр.
Ол чэрчитинэн, олунньу 13 күнүгэр И.И. Константинов-Дэлэгээт Уйбаан аатынан оскуолаҕа тыл үөрэҕин учууталларын методическай холбоһуга уонна Д.Ф. Наумов-Миитэрэй Наумов аатынан нэһилиэк олохтоох библиотеката “17-с страница” диэн дорҕоонноохтук ааҕыы күрэҕин ыыттыбыт.
Күрэххэ барыта 6 дьиэ кэргэн кыттыыны ылла. Усулуобуйа быһыытынан, үөрэнээччи оҕо ийэтинээн, аҕатынаан, эһэтинээн, эбэтинээн кыттан, бэриллибит кинигэ 17-с страницатын арыйан, онно баар тексты дорҕоонноохтук уонна иҥнибэккэ сөпкө ааҕыахтаах.
Быйыл Улуу Кыайыы 80 сылын бэлиэтиибит, ол быһыытынан күрэххэ кыттааччыларга саха фронтовик суруйааччылара Тимофей Сметанин уонна Иннокентий Артамонов кинигэлэриттэн аахтардыбыт. Тимофей Сметанинтан “Гурьянов” кэпсээнэ уонна Иннокентий Артамоновтан “Атаака кэнниттэн” хоһооно сөп түбэстилэр. Кыттааччы дьиэ-кэргэн, ааҕыы ыытыллар аудиториятыгар биир-биир киирэн, сонно тута бэриллибит кинигэни арыйа тардан, кыһаллан, иҥнибэккэ, доргуччу аахпыттара биһигини үөртэ. Ааҕыыны омук тылын учуутала, СӨ үөрэҕириитин туйгуна Раиса Иосифовна Стручкова салайан ыытта. Дорҕоонноохтук ааҕыы күрэҕин түмүгэ маннык буолла: I миэстэни ыллылар VI кылаас үөрэнээччитэ Родион уонна эһээтэ Иннокентий Ильич Исаковтар, II миэстэҕэ таҕыстылар VII-с кылаас үөрэнээччитэ Мичийэ уонна ийэтэ Оксана Славична Бурцевалар, III миэстэни ыллылар VI кылаас үөрэнээччитэ Андрей уонна ийэтэ Мария Славична Варламовтар. Маны таһынан анал ааттары туттардыбыт. Ол курдук, “Истээччини тардар ааҕааччы ” – V кылаас үөрэнээччитэ Адриан уонна ийэтэ Лена Владимировна Неустроевалар, “Дорҕоонноох ааҕааччылар” – VII кылаас үөрэнээччитэ Ангелина уонна ийэтэ Сахаяна Семеновна Избековалар, “Чуор куоластаах ааҕааччылар” — V кылаас үөрэнээччитэ Афоня уонна ийэтэ Анна Славична Носовтар дьиэ кэргэн. Анал аат хаһаайыттарыгар биир дойдулаахпыт, саха народнай суруйааччыта ДФ. Наумов-Миитэрэй Наумов “30 кэпсээн” диэн кинигэтин бэлэх туттардыбыт.
Онтон киэһэ Х.Максимов аатынан кулуупка Төрөөбүт тыл уонна сурук-бичик нэдиэлэтин үөрүүлээхтик аһыы буолла. Бу киэһэ кулуупка культура эйгэтигэр саҥа үлэлээн эрэр, уонна өссө да үөрэнэ сылдьар практикант ыччаттарбыт сүүрэн-көтөн, соун тэрээһини ыыттылар. Кыттыыны ыллылар “Айар”- үҥкүү ансаамбыла (сал. Мария Иванова), “Утум” фольклорнай бөлөх (сал. Вера Исакова), дьон сөбүлээн истэр ырыаһыта, сыана ветерана Данил Михайлов, эдэр ырыаһыттар Виталий Носов, Эдуард Тихонов. Фольклор бөлөҕүн ырыаларын-хомустарын уонна ырыаһыттары чопчулаан бэлэмнээтэ культура колледжын студена Эдуард Тихонов. Эҕэрдэ номердары сэргэ саха тылыгар уонна литературатыгар викторина ыытылынна. Онтон бүгүн, олунньу 14 күнүгэр “Сахалыы дьыктаан” бүтүн республикатааҕы акция XI-c төгүлүн ыытыллар aкцияҕа кыттан дьыктаан суруйуутугар 14 киһи суруйан кытынна, дьыктааны СӨ үөрэҕириитин туйгуна Венера Васильевна Данилова аахта. Текст ыарахан соҕус да буоллар, кыһаллан туран суруйдубут.
Нэдиэлэ салҕанар, өссө да үгүс, сонун тэрээһиннэр буолуохтара.
Елена Попова.