Бүгүн олунньу 18 күнүгэр «Тэтим» түөлбэбит төрүттэммит күнүн бары үөрэн-көтөн туран түмсүүлээхтик бэлиэтээри сарсыардаттан оҥостон, сахалыы таҥаспытын кэтэн, оҕолуун-уруулуун «Дружба» спортсаалатыгар тиэтэйэ-саарайа кэллибит. Бэлиэ күммүтүн саха сиэринэн алгысчыт Кочаткин Василий арыйда, арчылаата,ыраастаата, аал уоппутун арыылаах алаадьынан күндүлээтэ. Сааскы салгын сайа биэрдэ, саха дьоно өрө тыынныбыт. Өрөөбүт уоһу өһүлэн,хоммут уоһу хоҥнорон оһуокайы Елизавета Макарова, Феврония Данилова дьиэрэттилэр.
Түөлбэбит салайааччыта Анатолий Федоров түөлбэ күнүнэн эҕэрдэтин тиэртэ, туох үлэ барбытын сырдатта, инники соруктары, түөлбэ активын билиһиннэрдэ, ытыс тыаһыгар доҕуһуоллатан көхтөөх дьоҥҥо бэлэхтэри туттарда, инникитин да ыытыллар тэрээһиннэргэ кытта туралларыгар ыҥырда. Салгыы эҕэрдэ тылын Амма нэһилиэгин баһылыга Михаил Артемьев тириэртэ.
Кини түөлбэбит үлэтин, «түмсүүлээхтик үлэлиигит, атын түөлбэлэргэ холобур буолаҕыт, бу аан маҥнай маннык тэрээһини эһиги саҕалаатыгыт, мустан, оҥостон кэлбиккит биир туспа дэриэбинэ дьонун саҕа буолбуккут»,- диэн сөҕөн-махтайан туран махталын биллэрдэ, нэһилиэккэ туох үлэ барарыттан саҕалаан, олоҥхобут ыһыаҕар бары көхтөөхтүк кыттыаҕын диэн ыҥырда, «Мини парк -Тэтим» түөлбэ биир дьоһун бырайыага олоххо киирэригэр салгыы үлэлэһиэхпит»,- диэн эрэннэрдэ, олохтоохтор санаабытын сэргэхситтэ. Түөлбэбит көхтөөх, эрэллээх олохтооҕор Неустроев Михаил Ильичка, буулдьанан ытыынан дьарыктанар, кэнники үгэс буолбут ох саанан ытыыга республика чемпионугар Баранов Егор Анатольевичка Махтал суруктарын туттарда. Бу күҥҥэ анаан быыстапка бастыҥа тардыллынна, кэрэ оҥоһук, араас коллекциялар дьон-сэргэ көрүүтүгэр уурулуннулар. Онно бааллар саахымат, кыбытыы олбохтор, сахалыы туос иһиттэр, мунньар идэлээх дьоммутуттан уруучука арааһа, киэргэл брошка дьиктитэ, куукула эҥин арааһа, открыткалар, ааспыт кэм кэрэһитэ, урукку олох туоһулара альбомнар, кинигэлэр, блокноттар. Быыстапкаҕа Чикальдина Александра Егоровна, Артемьева Екатерина Прокопьевна , Сирдитова Анастасия Васильевна, Кондакова Анна Дмитриевна, Акимова Наталья Владимировна, Дьячковская Дария Елисеевна, Герасимова Надежда Петровна кытыннылар. Дьоро күнү бэйэлэрин музыкальнай эҕэрдэлэринэн Ирина Васильева, Григорий Петров киэргэттилэр.
Биһиги түөлбэҕэ эдэр ыаллар эбиллэ тураллар. Ол курдук спортивнай уулуссаҕа Адамовтар, Ивановтар, Кеша Алексеев уулуссаҕа Федоровтар дьиэ кэргэттэрэ. Кинилэргэ анаан Арассыыйаҕа Дьиэ кэргэн сылынан түөлбэ аатыттан өйдөбүнньүк бэлэх туттарылынна, эдэр дьон хардаларын түөлбэлэрин олоҕор көхтөөхтүк кыттыах буолан эрэннэрдилэр. Дьоро күммүтүгэр кылгастык иһитиннэриилэри, наадалаах сүбэлэри фтизиатр -быраас Захарова Наталья Николаевна, Амматааҕы ИДЬО начальнигын солбуйааччы Дьяконов Валерий Семенович, ПДН инспектора Никифорова Лилия Никодимовна, холуобунай ирдэбил сотруднига Драгунов Евгений Олегович туһааннаах үлэлэринэн хайысхатынан биэрдилэр. Бүгүҥҥү дьоро күммүт, тэтимнээх, эрчимнээх «Тэтим» түөлбэбит олохтоммут күнэ — Олунньу 18 күнүнэн бэлиэтэнэр буолла. Эһиил 2025 сылга үбүлүөйдээх сылбытын бэлиэтиэхпит диэн бары олохтоохтор дуоһуйа сынньанан, доҕоттордуун көрсүһэн, “эн, мин, бары бииргэ биир Амма олохтоохторобут, биир түөлбэ дьонобут” диэн кэскиллээх санааны ылынан, дьоллонон тарҕастыбыт.
Феврония ДАНИЛОВА