Амма нэһилиэгин олохтооҕо, тыыл уонна үлэ бэтэрээнэ Евдокия Васильева 90 сааһын томточчу туолла. Ытык кырдьаҕаһы улуус салалтата истиҥник эҕэрдэлээтилэр.
Евдокия Михайловна Васильева 10 күнүгэр 1934 сыллаахха Амма улууһун Чакыр нэһилиэгэр «Арыылаах» диэн алааска холхуостаахтар дьиэ кэргэннэригэр төрөөбүтэ. Аҕа дойду улуу сэриитэ саҕаланыытыгар Евдокия Михайловна 6 сааһын ааспыта. Ыал улахан оҕото буолан, колхоз үлэтигэр барытыгар ийэлээх аҕатыгар көмөлөһөрө. Бурдук туорааҕын бааһынаттан хомуйан кыра мѳһѳѳччүккэ куталлара, аны күтэрдииллэрэ, ол быыһыгар кыра балтын көрсөрө.
Сэрии кэнниттэн сайынын окко үлэлиирэ, онтон оҕуруот аһа олордор буолбуттарыгар хортуоппуй, турнепс, моркуоп олордуутугар сылдьыбыта. Күһүн аны хомуйуутугар үлэлиирэ. Арыый улаатан баран, сайын от үлэтигэр биригээдэҕэ повардаабыта.Тэлиэгэлээх атынан отчуттарга ас таһара уонна ас буһарара. Кэнники кэргэн тахсан баран, пенсияҕа тахсыар диэри ыанньыксыттаабыта. Ол үлэлиир кэммэр икки төгүл 2000-лаах кирбиини ылбытым. Биирдии ынаҕыттан сылга 2 тыһыынча киилэ үүтү ыан үрдүк ситиһиилэммитэ.
“Оччотооҕу ыанньыксыт үлэтэ ыарахан бѳҕѳ буоллаҕа. Дулҕаны кырбаан сиэтэбит, кѳѳнньѳрбѳ оҥоһуута, таһыыта. Yлэбин син сыаналаабыттара. Кэргэмминээн Василий Иосифовичтыын 4 оҕону тѳрѳтѳн, иитэн, үѳрэттэрэн атахтарыгар туруордубут. Кэргэним арыый эрдэ күн сириттэн барбыта. Оҕолорум бары ыал аҕалара, эһэлэрэ, ийэлэрэ. Улахан уол Елисей 3 оҕо амарах аҕата, сиэннэрдээх. Кыра уол Кирилл 3 оҕо аҕата, сиэннэрдээх. «Алмазы Анабара» үлэлээн пенсияҕа тахсыбыта. Улахан кыыс Валентина эргиэн үлэһитэ. 4 оҕолоох. Кыра кыыс Василиса балыыһаҕа үлэлиир. 3 оҕолоох. Аҕабыт Василий Иосифович техникаҕа сыһыаннаах этэ. Yксүн суоппардаабыта, мэхээнньик да курдук сылдьыбыта. Наада буоллаҕына электрик да буолара, иистэнэр массыынаны, таӊас сууйар да массыынаны, бытовой прибордары да барытын бэйэтэ ѳрѳмүѳннүүр этэ. Онон уолаттара тракторист, суоппар идэлээхтэрэ. Кыргыттарым эмиэ массыына ыыталлар. Билигин бэйэм бочуоттаах сынньалаҥҥа олоробун. Сиэннэрбин, хос сиэннэрбин кѳрсѳбүн, кѳмѳлѳһѳбүн”, — диэн этэр ытык кырдьаҕас Евдокия Михайловна.
Ытык мааны сааһын туолбут өрөгөйдөөх күнүнэн Евдокия Михайловнаны улуус баһылыгын социальнай боппуруостарга солбуйааччы Ньургуйаана Илларионова, Амма нэһилиэгин баһылыгын солбуйааччы Альберт Яковлев, Амматааҕы социальнай көмүскэл кэлим киинин салайааччытын солбуйааччы Сахаяна Неустроева, улуус бэтэрээннэрин Сэбиэтин бэрэссэдээтэлэ Мария Захарова истиҥник эҕэрдэлээн өрөспүүбүлүкэ, улуус эҕэрдэ суруктарын туттардылар.
Ытык киһибитин Евдокия Михайловнаны 90 сааһын томточчу туолбутунан ис сүрэхтэн эҕэрдэлиибит, чэгиэн доруобуйаны, үөрэ-көтө Улуу Кыайыы 80 сылын көрсөргөр!
“Амма олоҕо” хаһыат