Кулун тутар 15-17 күннэригэр Арассыыйа бэрэсидьиэнин быыбара буолар. Бу үс күн устата сарсыарда 8 чаастан киэһэ 20 чааска диэри Арассыыйа 18-һын туолбут эдэр, орто, аҕам саастаах олохтоохторо быыбардыыр учаастактарыгар тиийэн, дойдуну салайар кыахтаах, эрэнэр кандидаттарыгар куоластарын биэрэн бэйэлэрин гражданскай иэстэрин толоруохтара.
Амма улууһугар быыбардыыр учаастактар кулун тутар 6 күнүттэн быыбары ыытыыга бэлэмнэнии үлэтин саҕалаабыттара. Быыбар үлэтин биир сүрүн тэрээһинэ баһаартан сэрэхтээх буолууга өйдөтүү үөрэҕэ буолар. Күн бүгүн улуус бары 16 быыбардыыр учаастактарыгар баһаартан сэрэхтээх буолуу үлэтэ түмүктэннэ.
Амма улууһугар СӨ баһаары утары судаарыстыбаннай сулууспа 9 нүөмэрдээх этэрээтин 1-кы нүөмэрдээх баһаарынай чаас баһаары сэрэтэр инструктора Анастасия Кочаткина иһитиннэрбитинэн, кулун тутар 6-12 күннэригэр баһаарынай чаас салайааччылара Анатолий Седалищев Болугур, Амма Наахара, Петр Романов Алтан, Эмис, Сатаҕай, Василий Ефимов Соморсун, Мээндиги, Сулҕаччы, Сэргэ Бэс бөһүөлэгэр, Сергей Иванов Чакыр, Покровка, Антон Устинов Абаҕа, Леонид Чириков Бөтүҥ, инструктордар Анастасия Кочаткина уонна Наталья Неустроева Амма, Чапчылҕан нэһилиэктэригэр сылдьан быыбар хамыыһыйатын үлэһиттэригэр баһаартан сэрэхтээх буолууга үөрэх ыыттылар, инструктаж толортордулар, хайдах эвакуацияланарга эрчиллии оҥортордулар, баһаартан утары 132 листовканы түҥэттилэр. Бары учаастактар бэлэмнэрин эттилэр.
Вера Иванова.