Саха өрөспүүбүлүкэтин Судаарыcтыбаннаһын күнэ бүгүн улуус дьаһалтатын дьиэтигэр олус истиҥ эйгэҕэ бэлиэтэннэ. Кииннэммит бибилэтиэкэ Судаарыстыба күнүгэр аналлаах кинигэ быыстапката анал көрдөрүүгэ туруорда. Үөрүүлээх тэрээһин дойдубут өрөгөй ырыатынан саҕаланна.
Маннык үөрүүлээх бэлиэ күҥҥэ мустубут ыалдьыттары Амма улууһун баһылыгын э.т. Виктор Смирников, СӨ норуотун хаһаайыстыбатын үтүөлээх үлэһитэ, Амма улууһун бочуоттаах олохтооҕо, муниципиальнай сулууспа бэтэрээнэ, улуус баһылыгын сүбэһитэ Александра Шестакова, СӨ үөрэҕириитин туйгуна, РФ үөрэҕириитин бочуоттаах үлэһитэ, Амма улууһун, Болугур нэһилиэгин бочуоттаах олохтооҕо, кыраайы үөрэтээччи Тимофей Никифоров, үлэ бэтэрээнэ Амма улууһун уонна Чапчылҕан нэһилиэгин бочуоттаах олохтооҕо Николай Шелковников истиҥ тылларынан эҕэрдэлээтилэр.
Бу күн үрдүк наҕараадалары Амма улууһун бочуоттаах олохтооҕо аатын үлэ бэтэрээнэ, Чапчылҕан нэһилиэгин бочуоттаах олохтооҕо Николай Шелковников, «СӨ транспорын бочуоттаах үлэһитэ» бэлиэни Амма улууһун ГИБДД начальнига, полиция майора Валерий Тылбыков, “Амма киэн туттуута” үрдүк аат ойуур хаһаайыстыбатын бэтэрээнигэр, Бөтүҥ нэһилиэгин учаастагын леснигэ Егор Борисов, Ил Дархан Махтал суругунан ГУП ОДЬКХ Амматааҕы филиалын слесарь-ремонтнига Иван КАРАМЗИН, СӨ Бырабыыталыстыбатын Бочуотунай грамотатынан ветеринарнай управление лабораториятын дириэктэрэ Екатерина Жиркова, СӨ идэлээх сойуустарын федерациятын Бочуотунай грамотатын, СӨ муниципальнай сулууспатын туйгуна Оксана Емельянова, улуус баһылыгын сүбэһитэ Александра Шестакова СӨ Киин быыбардыыр хамыһыйа Эҕэрдэ суругунан, улуус дьаһалтатын Махтал суругунан Амматааҕы ойуур хаһаайыстыбатын инженердэрэ Алексей Борисов, Иван Никитин наҕараадаланнылар.
Үөрүүлээх бэлиэ тэрээһиҥҥэ СӨ култууратын туйгуна Мотрена Васильева салайар «Ыра санаа» ансаамбыла уонна Владимир Дедюкин ылбаҕай ырыаларын бэлэхтээтилэр.
Артем ОСИПОВ