Улуус депутаттара чөл олоххо, спорка көҕүлүүллэр

Аллараа Бэстээх бөһүөлэгэр Илин эҥэр улуустар депутаттарын спартакиадата ыытылынна. Биэс көрүҥнээх спортивнай күрэх түмүгэр аммалар түөстэригэр боруонса мэтээл килбэйдэ.

Илин эҥэр улуустар депутаттара бэҕэһээ Ил Түмэн Судаарыстыбаннай мунньахха киэҥ ыҥырыылаах көрсүһүүнү тэрийбиттэрэ. Ол кэннэ бүгүн аны спорка ордук кыахтааҕы, бааттааҕы быһаарсан волейболга, дуобакка, баскетбол корзинатыгар мээчиги киллэриигэ, ыстаҥаҕа уонна дартска күрэхтэстилэр. Дуобакка уонна дартска биһиги улууспут хамаандатын ким да быһа түспэтэ, онтон баскетболга аммалар бочуоттаах үһүс миэстэни ыллылар. Онон уопсай түмүккэ кыайыы хаһаайыттар — мэҥэ хаҥаластар диэки «мүчүк» гынна. Онтон Уус Алдан үрүҥ көмүс мэтээллэннэ.

Чөл олоҕу, спорду көҕүлүүр депутаттар күрэхтэрэ ыытыллыбыта бэрт сонун уонна интэриэһинэй,  эрийсиилээх, «Ким кыайыай?»диэн ыйытыыта хара түмүктэниэр диэри аһаҕас буолла.

«Амма  олоҕо» хаһыат.

Читайте дальше