Амма Наахараҕа устудьуон оҕолор этэрээттэрэ кэлэн уонча күн нэһилиэги сэргэхситэн, үлэ бөҕөнү үлэлээн бардылар. Этэрээти ХИФУ Мииринэй куоракка филиалын “Прикладная математика и информатика” факультет 4 кууруһун устудьуона Дьулустан Олесов салайан илдьэ сырытта.
Сытыы-хотуу, аныгы көрүүлээх Дьулустан Олесов этэрээт үлэтин туһунан маннык кэпсиир:
-Биһиги Ангелина Архипова, Алексей Сутаков, Арчын Чириков, Арыйаан Аммосов, Диана Петрова, Агафья Игнатьева, Нарыйаана Андреева, Вячеслав Бочкарев, Кирилл Мамруков буолан быйыл сайын устудьуоннар этэрээттэригэр сырыттыбыт. Биһигини Амма улууһугар социальнай уонна ыччат политикатын салаатын салайааччыта Саргылана Петровна Неустроева түмпүтэ. Этэрээккэ ХИФУ уонна колледжтарга үөрэнэ сылдьар оҕолор киирдибит. Бастакы үлэлээбит сирбит Абаҕа буолар. Бастаан үс күҥҥэ үүтээҥҥэ тахсан күрүө көтүрэн ону сааһылаабыппыт. Олбуорга баар эргэрбит мастары таспыппыт, ыраастаабыппыт. Онтон Абаҕаҕа төннөн балаҕаҥҥа олорбуппут. Үлэбит диэн эмиэ тыаҕа курдук күрүө көтүрүүтэ уонна дьаарыстааһына, олбуор ыраастааһына буолбута. Өссө сарай көтүрбүппүт, эргэрбит мастары уонна тимирдэри таспыппыт. Ити курдук 7 күн Абаҕаҕа үлэлээбиппит. Аһынан үчүгэйдик хааччыйбыттара.
Онтон сынньанан баран Өнньүөскэ кэлбиппит. Сөбүлэҥ түһэрсэн 5 күҥҥэ үлэлиэхтээх этибит эрээри үлэбит бүппэккэ эбии хаалбыппыт. Ити гынан Өнньүөскэ 9 күн сырыттыбыт. Просека ыраастаабыппыт, улахан ардахха сууллубут, эрбэммит мастары тастыбыт. Маннык сылдьан бэйэ-бэйэбитин кытта билсэн, доҕордостубут. Уонна үөрэх кэннэ сайыҥҥы сынньалаҥҥа бириэмэбитин туһалаахтык атаардыбыт дии саныыбыт. Сири-дойдуну көрдүбүт, үлэлии үөрэннибит. Үлэлээбит Абаҕа, Өнньүөс нэһилиэктэрин дьаһалтатыгар барҕа махталбытын тиэрдэбит. Бэйэбит кыахпытынан үлэлээн, нэһилиэк ыччатын кытта билсэн, кэрэ айылҕалыын алтыспыт эдэр сааспыт чаҕылхай күннэрин өйдүү-саныы сылдьыахпыт.
Эдэр саас сайыҥҥы эрчимнээх күннэрин үлэнэн муҥурданан туһалаахтык атаарбыт үлэһит устудьуон оҕолорбутугар олохторугар ситиһиини, табыллыыны баҕарыаҕыҥ! Эдэр ыччаты түмэр хайысхалар бааллара үүнэр көлүөнэни биир тыыҥҥа иитэр-үөрэтэр.
Ирина Корякина — Олесова.