Саҥа үүммүт 2024 сыл Арассыыйаҕа дьиэ кэргэн сылынан биллэрилиннэ. Ол чэрчитинэн Амма Наахара нэһилиэгэр Мария Заборовская дириэктэрдээх спортивнай саалаҕа нэһилиэк дьиэ кэргэттэрин икки ардыларыгар кыһыҥҥы уһун өрөбүллэргэ сыллата ыытыллар «Үс көлүөнэ» волейбол күрэҕэ буолан ааста.
Күрэххэ уолаттарга Пахомовтар, Александровтар уонна Ефремовтар, онтон кыргыттарга Пахомовтар-1, Александровтар, Пахомовтар-2 уонна күрэх таһынан оскуола кыргыттара эргимтэлии оонньоотулар. Тыҥааһыннаах киирсиилэр кэннилэриттэн уолаттарга 1-кы миэстэни Пахомовтар, 2-с миэстэни Ефремовтар, 3-с миэстэни Александровтар ыллылар. Онтон кыргыттарга кыайыылааҕынан Пахомовтар-1, 2 миэстэ Александровтар, 3 миэстэ Пахомовтар-2 тахсан кыайыы кынаттаннылар. Хамаанданан уопсай түмүккэ Пахомовтар аймах иккис сылын кыайдылар.
«Лучший нападающий» анал ааты Валерия Николаева, Альберт Пахомов ылан Захар Александров дьиэ кэргэниттэн бириис туттулар.
«Лучший защитник» анал ааты Эльза Лебедева, Байсен Николаев ылан Пахомовтар 1 дьиэ кэргэн туруорбут бирииһин ыллылар.
«Лучший игрок» анал аакка Аэлита Пахомова, Павел Заборовскай тахсан Пахомовтар 2 хамаандалара оҥорбут бирииһин тутан үөрдүлэр. «Перспективный игрок» анал аат хаһаайынынан Любомир Трофимов буолла. Любомирга «Чэлгийээнэ» эбээлэр түмсүүлэрин туруорбут бирииһин туттардылар. Араас таһымнаах күрэххэ буоларын курдук сылаас аһынан минньигэс астаах ийэлэр Ульяна Абрамова, Матрёна Гермогенова, Мария Захарова хааччыйдылар. Күрэх сүрүн суудьуйатынан Мария Заборовская, дикторынан Людмила Александрова уонна Талбан Мартынов кэпсээн-салайан оонньууну күөдьүттүлэр.
Кыһыҥҥы уһун өрөбүллэргэ олорон хаалбакка, нэһилиэк чөл олохтоох буолуутугар ыытыллар үлэни олохтоох дьаһалта баһылыга Захар Александров, ыччат түмсүүтүн салайааччыта Мичил Ефремов, спорт исписэлииһэ Мария Заборовская көдьүүстээхтик саҕалаатылар. Билиҥҥи олоххо түмсүүлээх буоллахха кыайыыга кынаттаныы суола буоларын умнумуоҕуҥ!
Ирина Корякина — Олесова.