Бүгүн, сэтинньи 28 күнүгэр, Амма улууһун оскуолалара Н.Е. Иванов аатынан Бөтүҥ орто оскуолатыгар түмсэн Олоҥхо декадатын чэрчитинэн Олоҥхону бырайыактыыр ньыманан үөрэтэр-чинчийэр «Айыы намыһын ырыаһыттар» диэн улуустааҕы сетевой бырайыакка кытыннылар.
Бу бырайыак 2015 сыллаахтан силистэнэн улуус оскуолаларынан көһө сылдьан ыытыллар. Бырайыак сүрүн ааптарынан педагогическай үлэ бэтэрээнэ, тумус туттар киһибит, өр сылларга үөрэх управлениетын методическай отделын салайааччытынан үлэлээбит Клара Кириллина буолар. «Айыы намыһын ырыаһыттар» быйылгы дьарыга Амма улууһугар Олоҥхо ыһыаҕа ыытылларыгар бэлэмнэниигэ ананна.
Мастырскыай саха олоҥхото норуот культуратын тиэкиһэ буолан сайдан тахсыытыгар Амматтан тахсыбыт улуу олоҥхоһуттар Е.М. Новиков — Мэлэк Мэхээлэ, Т.В. Захаров — Чээбий, Е.Е. Иванова, У.Г. Нохсоров, В.М. Новиков — Күннүк Уурастыырап, Ю.П. Борисов киллэрбит кылааттарын, кинилэр олоҥхо оскуолата буолалларын бигэргэтэр аналлаах.
Бырайыак сүрүн сыалынан мастарыскыай форматынан үөрэх ураты халыыбын, ньымаларын тобулан тэрийии, үөрэнээччи бэйэтин сайыннарар, сыаналанар дьоҕурун салгыы сайыннарыы буолар. Маныаха Бөтүҥ, Абаҕа, Эмис, Сулҕаччы орто оскуолалара тирэх буолаллар.
Амма улууһун оскуолаларын 5, 6, 7, 8 кылаас үөрэнээччилэрин дьарыктарын көрөн олорон оскуолалартан кэлбит салайааччылар, ыҥырыылаах ыалдьыттар сыаналааһын лииһин толороллор. Маны сэргэ ыҥырыылаах консультаннар миэстэтигэр, эбэтэр тэйиччиттэн олорон экспертыыллар.
Бырайыак быйылгы үлэтигэр ыҥырыылаах ыалдьыттарынан улуус баһылыгын социальнай боппуруостарга солбуйааччы Нюргуяна Илларионова, Бөтүҥ нэһилиэгин баһылыга Алексей Никитин, бырайыак ааптара Клара Кириллина, “Тэтим” араадьыйа ыытааччыта Татьяна Степанова, үөрэх управлениетын сүрүн исписэлииһэ Виктория Бурцева, Абаҕа оскуолатын дириэктэрэ Людмила Александрова, Эмис оскуолатын дириэктэрэ Гаврил Захаров, Сулҕаччы оскуолатын дириэктэрэ Иван Окороков буоллулар.
Экспердэринэн улуус култууратын управлениетын исписэлиистэрэ Анна Кириллина, Николай Нестерев, Валерий Кириллин үлэлээтилэр.
Күн устата дакылаат ааҕыытыгар 9, хаһыат оҥорууга 10, испэктээккэ 11, кырыымпаҕа 10, олоҥхону толорууга 8, уруһуйга 16, иискэ 9, уһаныыга 14 оҕо кыттанар үлэ таһаарыылаахтык барда.
Бүгүҥҥү мастерскойдар үлэлэрин түмүктэринэн бырайыак эһиил Абаҕа оскуолатыгар салҕанара быһаарылынна.
Акулина ИВАНОВА, Бөтүҥ орто оскуолатын дириэктэрэ.