Үөрэнээччилэр спартакиадаларын түмүгэ таҕыста

Амма улууһун оскуолаларын икки ардыларыгар ыытыллар үгэс буолбут комплекснай спартакиада үөрэх дьылын устата ыытыллан түмүгэ билиннэ. Оскуолалар оҕо ахсаанынан икки бөлөххө арахсан спорт 17 көрүҥэр тургутууну ааһаллар. Быйылгы күрэх бастыҥнарынан кимнээх буоллулар?

Комплекснай спартакиада элбэх ахсааннаах үөрэнээччилэрдээх оскуолаларга 12 көрүҥ, оттон аҕыйах ахсааннаах үөрэнээччилээх оскуолаларга 8 көрүҥ түмүгүнэн тахсар. Кыһын устата оҕолор барыта спорт 17 араас көрүҥэр бэйэ кыаҕын тургуттулар. Дуобат, остуол тенниһэ, саахымат, баскетбол, хабылык, хаамыска, сахалыы ыстаҥа, мини-футбол, бадминтон, хапсаҕай, пионербол, мас тардыһыы, волейбол, буулдьанан, ытыы, “ГТО”, эстафета, чэпчэки атлетика, спортивнай ориентирование көрүҥнэринэр күрэхтэр көрдөрүүлэрэ түмүллэн уопсай түмүк таҕыста.

Элбэх үөрэнээччилээх оскуолаларга, 1 бөлөххө, кыайыылааҕынан В.В. Расторгуев аатынан Амма 2№-дээх оскуолата таҕыста. Иккис миэстэ В.Г. Короленко аатынан Амма 1№-дээх оскуолата, үһүс миэстэ Л.В. Киренскэй аатынан Амматааҕы лиссиэй буоллулар.

Иккис бөлөххө, аҕыйах ахсааннаах үөрэнээччилээх оскуолаларга, кыайыылааҕынан В.М. Новиков – Күннүк Уурастыырап аатынан Эмис оскуолата таҕыста. Иккис миэстэни Чакыр оскуолата, үһүс миэстэни П.И. Яковлев аатынан Амма Наахара орто оскуолата ыллылар.

-Маннык тэрээһиннэр оҕону спорка көҥүлүүллэрин сэргэ чөл олоххо, саастыылаахтарын кытта доҕордуу сыһыаны олохтуурга олук уураллар,- диэн улуустааҕы үөрэх салалтатын спорка салаатын исписэлииһэ Эдуард Сивцев санаатын үллэстэр.

“Амма олоҕо” хаһыат.

Читайте дальше