Бүгүн учуутал күнүгэр Үлэ Геройа П.И.Яковлев аатынан Амма Наахара орто оскуолатыгар эбии 12-с кылаас аһыллынна. Бу кылааска учууталлар үөрэнээччи буолан үөрэммит кэмнэринии үөрэннилэр, билиилэрин тургутан көрдүлэр. Барыта биэс уруок үрдүк таһымҥа ааста. Уруоктары үрдүкү кылаас үөрэнээччилэрэ ыыттылар.
Ол курдук 11-с кылаас үөрэнээччилэрэ Нарыйаана Макарова ахсаан уруогун, Любомир Трофимов физкультураны, Мирослав Романов химияны, Алина Мартынова нуучча тылын уонна 10-с кылаас үөрэнээччитэ Сандал Павлов төрөөбүт тыл литературатын учууталларыгар үөрэттилэр. Учууталлар үөрэнээччилэрбит оттомноохторуттан, эппиэтинэстээхтэриттэн олуһун астынныбыт. Үһүс уруок кэнниттэн бэйэни салайыныы уоргана учууталлары «Эҕэрдэ переменаҕа» түмтэ.
Манна үөрэнээччилэр эҕэрдэ нүөмэрдэри толордулар, сэмэй бэлэхтэри туттардылар. Үөрүүлээх чааһы киэргэтэн Амма Наахара нэһилиэгин аҕа баһылыга Захар Александров илии баттааһыннаах 100 000 солкуобайдаах сэртипикээти баһылык солбуйааччыта Сахаяна Михайлова саҥа үөрэх дьылыгар аһыллыбыт «Точка роста» хайысхаҕа миэбэл ылыытыгар диэн туттарда.
Бу күн оҕолор имигэс илиилэринэн оҥоһуктарын учууталларыгар бэлэх уунан үөрэҕи кытта үөрүүнү тэҥҥэ бэлэх ууннулар, кэрэни-сырдыгы баҕардылар. Сылаас сыһыан, үөрүү долгуна хаһан да сүппэтин Эһиги эйгэҕититтэн, үтүө санааҕытыттан, сүбэһит-амаһыт Учууталларбыт!
Ирина КОРЯКИНА-ОЛЕСОВА