Ыһыахха бэлэмнэнии боппуруостарын чопчулууллар

Нэһилиэк баһылыктара кыттыылаах Олоҥхо ыһыаҕар бэлэмнэнии киэҥ ыҥырыылаах сүбэ мунньаҕа буолан ааста. Мунньаҕы улуус баһылыга Степан Кузьмин салайан ыытта.


Баһылык киирии тылыгар мунньахха ыытыллыбыт үлэлэри буолбакка, билигин ол хайысхатынан кыаллыбакка, аһаҕас турар боппуруостары дьүүллэһэргэ эттэ. Ол быһыытынан ыһыах култуурунай бырагырааматын, территорияны оҥоруу, тырааныспарынан хааччыллыы, ыһыахха киирии суоллар, парковка, ыалдьыттары түһэрии, издательскай үлэ, волонтерскай үлэ уонна да атын тэрээһин боппуруостарынан  туһааннаах хамыыһыйалар бэрэссэдээтэллэрэ, чилиэннэрэ  култуура уонна норуот айымньытын управлениетын салайааччыта Иван Иванов, улуус баһылыгын тутууга солбуйааччыта  Виктор Смирников, улуус дьокутааттарын Сэбиэтин бэрэссэдээтэлэ  Владимир Колосов, улуус баһылыгын социальнай боппуруостарга солбуйааччыта Нюргуяна Илларионова, үөрэх управлениетын салайааччыта  Александр Ларионов,  «Биисинэс-инкубатор» дириэктэрэ Николай Афанасьев, СӨ Роспотребнадзор Амматааҕы салаатын салайааччыта  Айыллаана Романова уонна да атыттар иһитиннэриилэри оҥордулар, боппуруостарга эппиэттээтилэр. Сүбэ мунньахха нэһилиэк баһылыктара кыттаннар мунаара сылдьар боппуруостарын ыйыттылар, этиилэрин  киллэрдилэр. Ол курдук кэпсэтиигэ Амма нэһилиэгин баһылыга Михаил Артемьев кыттан сотору кэминэн күүстээх субуотунньуктар барыахтарын, ырааһырдыы үлэтигэр холбоһуктаах тэрилтэлэр  ситэ тахса иликтэрин этэн туран,  сыһыарыллыбыт территорияларын ырааһырдыыга тахсалларыгар ыҥырда уонна субуотунньукка көхтөөхтүк кытталларыгар эттэ.
Түмүккэ баһылык Степан Кузьмин хаалбыт кэмҥэ быһаарылла илик боппуруостарга күүскэ үлэлэһэн, биир санаанан быһаарсан, кыаллыбаты эрэ эппэккэ, туох баар өйбүтүн-санаабытын ууран туран үлэлээтэхпитинэ эрэ, өрөспүүбүлүкэ таһымнаах тэрээһини ыытыахпыт диэн бэлиэтээтэ.

«Амма олоҕо»хаһыат

Читайте дальше