Быйылгы Амма нэһилиэгин холбоһуктаах тэрилтэлэрин икки ардыларыгар ыытыллыбыт күрэх Олоҥхо сылыгар ананан “Олоҥхо оһуора” диэн ааттанан ыытылынна. Биир уратыта диэн үҥкүү кэлэктиибинэн буолбакка, үҥкүүнү дуэтынан толоруу буолла. Дьэ кимнээх кыайыылаахтар ахсааннарыгар киирдилэр?
Амматааҕы Ф. Потапов аатынан култуура киинигэр үҥкүү алыптаах киэһэтэ сэргэхтик буолан ааста. Көрөөччүлэр хас биирдии нүөмэргэ ытыстарын тыаһын харыстаабатылар. Күрэххэ сэттэ холбоһуктаах тэрилтэ хорсун, көхтөөх дьоно кыттан бэртээхэй үҥкүүлэри көрдөрдүлэр. Дьүүллүүр сүбэ бэрэссэдээлинэн СӨ култууратын туйгуна, А.А. Черемных аатынан оҕо искусствотын оскуолатын үрдүк категориялаах преподавателэ Любовь Саввина, чилиэннэринэн СӨ ыччат бэлиитикэтин , СӨ култууратын туйгуна, Бөтүҥнээҕи С.Я.Левин аатынан норуот айымньытын дьиэтин балетмейстера, “Махтал” норуот үҥкүүтүн ансамбылын салайааччыта Константин Попов уонна СӨ култууратын туйгуна, Чапчылҕаннааҕы М.М. Григорьев аатынан култуура киинин балетмейстэрэ Сангима Романова үлэлээтилэр. Дьэ кыайыылаахтарынан кимнээх ааттанылар, тэрилтэлэригэр наадалаах баал эптилэр?
1-кы степеннээх дипломаннарынан Амма нэһилиэгин олох дьаһах коммунальнай хаһаайыстыба, дьиэ кэргэҥҥэ уонна оҕолорго социальнай өҥөнү оҥорор салалта, “Кэнчээри” оҕо сайдар киинин уһуйаана, “Коммунтеплосбыт”, Күннүк Ууурастыырап аатынан Амматааҕы киин бибилэтиэкэ, «Амма олоҕо” эрэдээксийэ холбоһуктаах тэрилтэлэриттэн Дария Павлова уонна Ильяс Заровняев, 2-с степеннээх дипломаннарынан Амма нэһилиэгэ муниципальнай тэриллии дьаһалтатын, Амматааҕы Федот Потапов аатынан норуот айымньытын дьиэтин холбоһуктаах тэрилтэтиттэн Ксения Татаринова уонна Прокопий Григорьев, 3-с степеннээх дипломаннарынан Амматааҕы ис дьыала отделениятын сотрудниктара Кия Карташова уонна Никита Дьячковскай буоллулар. 1 –кы степеннээх лауреаттарынан урбаанньыттар тэрилтэлэрин үкүүһүттэрэ Любовь Саввинова уонна Александр Нестеров, 2-с степеннээх лауреаттарынан Амма улууһа муниципальнай оройуон дьаһалтатын, Амма улууһун 9№-дээх баһаарынай сулууспатын, Амма улууһун култуураҕа уонна норуот айымньытын салалтатын холбоһуктаах тэрилтэлэриттэн Елена Ногнорутова уонна Максим Боппоенов, 3-с степеннээх лауреаттарынан Ольга Иванова-Сидоркевич аатынан Амматааҕы айар сайдыы киин, Амматааҕы эдэр натуралистар уонна туристар станциялара, бэтэринээрнэй салалта, Россельхозбанк, Амматааҕы астыыр- үөллүүр кооператив холбоһуктаах тэрилтэлэриттэн Мария Степанова уонна Петр Попов ааттаннылар.
Дьэ онтон быйылгы күрэх муҥутуур кыайыылаахтарынан В.Г. Короленко аатынан Амма 1№- дээх орто оскуола учууталлара Наина Куличкина уонна Егор Бубякин буоллулар.
Бары кыайыылаахтарга дипломнар туттарылыннылар, Гран-при хаһаайыннара кубок туттулар. Итни сэргэ бары кыттыбыт дьону тэрилтэлэрэ кэлэн истиҥник эҕэрдэлээн сэмэй бэлэхтэрин туттаран, махтал тылларын анаатылар. Бу күн кэнсиэркэ кэлбит дьон “Күндүл” үҥкүү ансаамбылын, А.А. Черемных аатынан оҕо искусствотын оскуолатын хореография салаатын иитиллэччилэрин нарын үҥкүүлэрин, СӨ үтүөлээх артыыһа Александр Ушницкай, Николай уонна Нелли Пуховтар, быйылгы “Далбар Хотун” өрөспүүбүлүкэтээҕи күрэх муҥутуур кыайыылааҕа Саргылана Рожина ырыаларын астына –дуоһуйа иһиттилэр.
“Бары үҥкүүһүттэр үчүгэйдэр. Сүрдээҕин кыһаллыбыттар. Кыайыыны ылбыт дуэт бэлиэтиибин. Таҥастара-саптара, гримнэрэ, муусукулара барыта олус табыллыбыт. Онон дьиҥ чахчы Гран прри хаһаайыннара буоллулар.Дьүүллүүр сүбэҕэ туох да мөккүөр тахсыбата ”, — диэн Константин Семенович санаатын үллэһиннэ.
“Амма олоҕо” хаһыат