Амматааҕы коррекционнай оскуола интернат үлэлээбитэ 35 сылын бэлиэтээтэ. Үбүлүөйдээх сааһынан оскуола кэлэктиибэ ыраахтан-чугастан эҕэрдэлэри тутта, үлэ түмүгүн билиһиннэрдэ.
Үөрүүлээх бэлиэ күҥҥэ күндү ыалдьыттарынан оскуоланы төрүттээбит, бастакы дириэктэрэ Николай Гурьев, ол кэнниттэн араас сылларга оскуоланы салайбыт Никифор Бубякин, Афанасий Тимофеев, ону сэргэ араас кэмнэргэ үлэлээн ааспыт педагогтар, завучтар буоллулар, истиҥ иһирэх ахтыылары оҥордулар. Үбүлүөй күн кэлэктиип кэлбит ыалдьыттарга бэртээхэй кэнсиэри бэлэмнээн көрдөрдө. Оскуола кэлэктиибэ үбүлүөйүн чэрчитинэн өссө эрдэ доруобуйаларынан ураты көрүүгэ, сыһыаҥҥа наадыйар оҕолору кытта хайдах үлэлииргэ улуустааҕы семинар-практикум ыыппыта. Семинар кыттыылаахтара элбэҕи билэн-көрөн, бэйэлэригэр иҥэринэн барбыттарын бэлиэтээбиттэрэ. Онон элбэх интэриэһинэй маастар-кылаастар буолбуттара, оскуола-интернат устун экскурциялаан, бу ураты үөрэнээччилэрдээх оскуола хайдах-туох үлэлээн олорорун ыкса билсибиттэрэ.
Үбүлүөйгэ бэйэлэрин эҕэрдэлэрин улуус дьаһалтата, Амма нэһилиэгин дьаһалтата, оскуолалар дириэктэрдэрэ, тэрилтэлэрэ, үөрэх салаата тириэрдибиттэрэ. Ону сэргэ Уус Алдан улууһун Орто-Эбэ нэһилиэгиттэн, Мэҥэ Хаҥалас Өлөчөйүттэн биир идэлээхтэрэ, маны таһынан өр сылга бииргэ үлэлэһэр, доҕордоһон кэлбит өрөспүүбүлүкэтээҕи тулаайах уонна төрөппүт көрүүтэ-истиитэ суох хаалбыт оҕолор анал коррекционнай интернат оскуолатыттан бэрэстэбиитэллэр кэлэн эмиэ аммалар үбүлүөйдээх сылларын бэлиэтиир күннэрин тэҥҥэ үллэстибиттэрэ.
“Биһиги үбүлүөйдээх сылбытыгар олус үчүгэй “Доброшкола” диэн федеральнай бырагыраама көмөтүнэн алта кабинеттары саҥардан көрүстүбүт. Ол курдук бу бырагыраамаҕа кыттарга бэлэмнэнэн, бэйэбит кэлэктииппит күүһүнэн оскуолабытын өрөмүөннээн, саҥардыллыахтаах кабинеттары ирдэбиллэргэ эппиэттиир гына оҥорбуппут. Бырагыраамабатын кулун тутарга көмүскээн, сакаастаабыт оборудованиеларбыт атырдьах ыйыгар кэлэн, балаҕан ыйыгар үөрэнээччилэрбитин саҥардыллыбыт кабинеттардаах көрсүбүппүт. Оҕолорбут олус астыналлар, учууталлар да үөрэтэргэ, үлэлииргэ табыгастаах диэн өрө көтөҕүллэн туран үлэлии сылдьаллар. Ол курдук логопед кабинета, бэйэтэ бырагыраамата барыта турбут иистэнэр массыыналар, олоххо бэлэмниир социальнай хайысхалаах кабинет уонна да атын ураты оҕолору үөрэтэргэ анаммыт оборудованиелаах кабинеттар арыллан бу балаҕан ыйыттан толору үлэлии тураллар. Онон кэлэктиип 35 сыллаах үбүлүөйбүтүн кэккэ ситиһиилэрдээх көрсөн үөрүүбүт улахан”, — диэн оскуола дириэктэрин солбуйааччы Розалия Егорова санаатын үллэһиннэ.
Ураты көрүүгэ-истиигэ наадыйар оҕолор олоххо бигэтик үктэнэллэригэр, онно бэлэмнээх буолалларыгар күннэтэ түбүгүрэр, онно бары билиилэрин уурар оскуола кэлэктиибин үбүлүөйдээх саастарынан истиҥник эҕэрдэлиибит уонна үлэҕит ситиһиилээх, үөрэтэн таһаарбыт үөрэнээччилэргит бэйэлэрин суолларын булалларыгар баҕарабыт.
“Амма олоҕо” хаһыат