Амма Наахара нэһилиэгин «Түмэн» сынньалаҥ киинигэр П.А. Ойуунускай төрөөбүтэ 130 сылыгар аналлаах Олоҥхо декадатын чэрчитинэн «Туналҕаннаах ньуурдаах Туйаарыма Куо» испэктээк нэһилиэк уус-уран көрүү кыттыылаахтарын көмөтүнэн туран көрөөччүлэр биһирэбиллэрин ылла. Бу турбут үлэ улуус нэһилиэктэрин икки ардыларыгар ыытыллар фольклор фестивалын чэрчитинэн ыытылынна. Испэктээги Өнньүөс сиригэр сахалыы тыыны кыра саастан оҕо этигэр-хааныгар дьаныһан иҥэрэр «Үрүйэчээн» фольклорнай бөлөх салайааччыта Туяра Захаровна Мартынова итиэннэ култуура киинин методиһа Владимир Егорович Игнатьев туруордулар.
Саалаҕа сахалыы өбүгэлэрбит олорон ааспыт олохторун санатар тыын долгутуулаахтык киирдэ. Хомус дьүрүһүйэр тыаһа олоҥхо киириитин, тахсыытын, кырыымпа кылыһахтарын кэрэ дуораана, күпсүүр тыаһа доҕуһуоллаабыта олох ааспыт олоҕу санатта. Туяра Захаровна Мартынова төрөппүт оҕолорун кытары Алгыстааналыын хомуска, Талбан күпсүүргэ сахалыы тыыннаах дорҕооҥҥо оонньообуттарын олохтоохтор сэргии-кэрэхсии иһиттибит. Киһи турукка киирэн уйадыйыах, куттаныах, Туйаарыма Куоҕа күүс-көмө да буолуох санаата кииртэлээн ылла. Хараҥа күүһү сырдык кыайара олус бэркэ ойууланна. Оруолларга Туйаарыма Куону Колирия Мугурова, Үрүҥ Уоланы Владимир Игнатьев, Ньургун Боотуру Мичил Ефремов, Кыскыйдаан Куону Людмила Александрова, Уот Уһутаакыны Данил Макаров, Симэхсин эмээхсини Александра Пахомова, Сабыйа Баай Хотуну Сардаана Лебедева, Саха Саарын Тойону Давид Алексеев, Күн Дьирибинэни Талбан Мартынов, Олонхоһуту Матрена Романова, кини сиэннэрин Аяна Никифорова, Вася Иванов, Үрүҥ Аар Тойону Владислав Константинов, Адьына Сиэр Хотуну Екатерина Кузьмина, бухатыырдары Любомир Трофимов, Никита Макаров, Артем Тарабукин, Спартак Макаров, Туйаарыма Куо дьүөгэлэрин Анастасия Александрова, Феодосия Максимова, Екатерина Унарова, Айыына Бадмаева, Мария Устинова, Мария Заборовская толордулар. Үҥкүүлэри Светлана Захарова туруорда, Светлана Алексеева, Айталы Куо Иванова артыыстары гримнээтилэр.
Маннык кэрэ киэһэни бэлэхтээбит, олохтоохтор биһирэбиллэрин ылбыт барыга көхтөөх артыыстарбытыгар саҥаттан саҥа дабайыылары баҕарабыт. Туруорааччыларга сахалыы харыстыыр тылларынан олоҥхоҕо туойуллар куһаҕаннары өрүү кыйдаан дьоҥҥутун-сэргэҕитин ырааска, сырдыкка угуйун, айар-тутар дьоҕургут айар аартыккыт суолун өрүү тэлэччи аһан үрдүктэн үрдүк ситиһиини аҕаллын диэн алҕаатахпыт буолуохтун!
Ирина Корякина – Олесова.