Ох саанан ытыы спорт көрүҥүн быһыытынан кэнники кэмҥэ өрөспүүбүлүкэ үрдүнэн тэнийэн эрэр. Аҕыйах хонуктааҕыта Амма улууһун Бөтүҥ оскуолатын 1985 сыллаах выпускнига, урбаанньыт, Амма олохтооҕо Егор Баранов Саха сиригэр төрүт оонньуулар ассоциацияларын иһинэн «Сахаада- спорт» ох саанан ытыыга маастар нуорматын толордо.
Егор Анатольевич буулдьанан ытыынан дьарыктар, бэстэлиэтинэн ытыыга маастарга кандидат нуорматын эрдэ толорбута. Ааһан эрэр 2023 сыл Егорга элбэх ситиһиини бэлэхтээтэ. Кини өрөспүүбүлүкэҕэ төрүт ох саанан ытыыга хас да төгүллээх призёр, үс төгүл абсолютнай чемпион үрдүк аатын сүктэ. Быйыл «Модун» комплекска ыытыллыбыт рейтинг түмүгүнэн эр дьоҥҥо өрөспүүбүлүкэ 16 күүстээх охчуттарыгар 7-нэн киирдэ. Маастардары кытта саҥа саҕалаабыт охчут тэҥҥэ киирсэн кубогы ылан «Бастыҥ ытааччы» анал аат хаһаайынынан буолла.
Егор оскуолаҕа үөрэнэ сылдьан хайыһарга, сүүрүүгэ өрүү инники сылдьара. Атах оонньуутугар да бэйэтин кыанар буолан олус күүстээҕэ. Оҕо эрдэҕиттэн үөрэҕэр үчүгэй, уруһуйдьут ааттааҕа, барыга талааннаах. Кини кылааспыт байыаннай хамандыыра, ырыа-үҥкүү аргыстаах үлэһит мааныта буола улааппыта. Оччолорго оскуола аайы байыаннай үөрэх баара. Онно Гоша өрүү автомат ыһыыга, хомуйууга бастыыра. Аны сыал ытыытыгар учууталбыт Иосиф Иосифович Новиков салалтатынан тирга элбэхтик сылдьара. «Спорт бу көрүҥүнэн тохсунньу ыйтан «Дружба» комплекска киэһэ бириэмэбитин аттаран кэргэммин Любаны кытта күн аайы дьарыктанабыт, кэргэним кэккэ ситиһиилэрдээх. Ыытыллар күрэххэ барытыгар кыттабыт.
Дьарыктанарга күүстээх баҕа санаа сирдиир, спорка фанат буолуоххун наада. Күрэхтэргэ барарга-кэлэргэ бэйэбит уйунан сылдьабыт. Олунньуга улахан күрэххэ барар былааннаахпыт. Охторбутун бэйэбит соҕурууттан сакаастаан атыыласпыппыт. Быйыл өрөспүүбүлүкэ күүстээх ытааччыларын кэккэлэригэр киирэн табыллан сылдьабын. Бу көрүҥ Амма улууһугар саҥа киирэн эрэр. Бастаан соҕотоҕун, онтон Любабынаан, бииргэ төрөөбүт убайбынаан Федялыын, Соморсунтан бииргэ үөрэммит кыыһым Галина Кутукова буолан кэлиҥҥи күрэхтэргэ сырыттыбыт. Баҕа санаабар маастар нуорматын толоруу турар. Уонна Аммаҕа ыытыллар Олоҥхо ыһыаҕар күрэххэ толору састааптаах хамаанда тэринэн кыттыахха наада дии саныыбын. Амма кэнниттэн 2025 сылга Тааттаҕа ыытыллар «Манчаары оонньууларыгар» кыттыы эмиэ биир сыалым буолар»,- диир спортсмен Егор Анатольевич.
Любовь, Егор Барановтарга, спорду өрө тутар биир дьиэ кэргэҥҥэ ааһар эрэр сыл курдук ситиһиилэр өрүү кэлэ турдуннар! Үүнэр сыл үтүөнү, кэлэр сыл кэскили эрэ түстээтин!
Ирина Корякина — Олесова.