Оҕо көмүскэлин күнүгэр Амма Наахара нэһилиэгэр Оҕо ыһыаҕа бэрт сэргэхтик ыытылынна. Урукку сылларга нэһилиэк үөрэҕин сайдыытыгар үгүс ыччаты иитэн таһаарбыт оскуола киэҥ тиэргэнэ оҕо чуопчаарар саҥатынан, көрдөөх күлүүтүнэн туолла.
Амма Наахара нэһилиэгин Сардаана Лебедева салайар «Түмэн» сынньалаҥ киинин үлэһиттэрэ нэһилиэк оҕолорун, төрөппүттэри оҕо саас бырааһынньыгар түмтүлэр. Ыһыаҕы сынньалаҥ киин методиһа Светлана Захарова саҥаран-иҥэрэн бэрт сэргэхтик ыытта. Ыһыах үөрүүлээх аһыллыытыгар быйылгы сылга саамай көхтөөх оҕолорбут, дьон кутун туппут «Кыталыктаах кырдалым» киинэҕэ сүрүн дьоруойга атаҕар турарыгар санаа өттүнэн сүргэтин көтөхпүт Туйаара оруолугар оонньообут Аина Илларионоваҕа, ону сэргэ доҕор уолаттар оруолларыгар бэркэ табыллан оонньообут Тимофей Находкиҥҥа уонна Дамир Мартыновка, ону тэҥэ «Азия оҕолоро» норуоттар икки ардыларынааҕы күрэххэ кытта барар оҕобутугар Нарыйаана Никитинаҕа алгыстаах бэлэхтэри нэһилиэк дьаһалтата, «Түмэн» сынньалаҥ киин эҕэрдэлээн, төрөөбүт нэһилиэктэрин өрүү үтүө өттүнэн ааттата сылдьыҥ диэн баҕа санаалаах бэлэхтэри туттардылар. Эҕэрдэ тылы олохтоох дьаһалта баһылыгын солбуйааччы Сахаяна Михайлова, «Түмэн» сынньалаҥ киинин дириэктэрэ Сардаана Лебедева тириэртилэр. Бырааһынньыктааҕы кэнсиэри «Тэтим» үҥкүү бөлөҕө «Алгыс» үҥкүүтүнэн аста. Кырачаан оҕолорбут «Дуораанчык» уһуйааны быйыл бүтэрэр иитиллээччилэрбит ыллаан чуопчаардылар. Сахалыы куттаах Туяра Мартынова дьарыктыыр өрөспүүбүлүкэҕэ биллэр «Үрүйэчээн» кыра бөлөҕө норуот ырыаларыттан попурри, улахан бөлөх хомустаан дьүрүһүттүлэр. Барыга көхтөөх Алгыстаана Михайлова «Мохсоҕоллор» ырыатынан көрөөччүлэр хайҕалларын ылыаҕын ылла. Онтон Айталы Иванова көҕүлээһининэн флешмобка оҕолор, ыалдьыттар үҥкүлээтилэр. Ыһыах эҕэрдэ чааһын Туяра Захаровна оһуохай таһааран оҕолору оһуохай үҥкүүтүгэр киллэрэн түмүктээтэ.
Утуу-субуу «Уһун суһуох», «Бастыҥ аһастар», сахалыы таҥас, сүүрүү күрэҕэ ыытылынна. «Уһун суһуохха» кыайыылааҕынан Амелия Алексеева таҕыста. Иккис миэстэни Алгыстаана Мартынова, үһүс миэстэни Аяна Никифорова ылан сертификаттары, эҕэрдэ суруктары туттулар. Аһыыр дьон күрэҕэр үс уол кытынна. Ол курдук оҕолор икки ыстакаан үүт, ынах этэ, саламаат сиэтилэр. Тотоойу күрэххэ 3-с миэстэҕэ Емельян Никифоров,
2-с миэстэҕэ Виссарион Тарский, онтон 1-кы миэстэҕэ Томмот Кузьмин тахсан эмиэ сертификат туттулар. Оҕолорбут сахалыы таҥнан-симэнэн кэлбиттэрэ бырааһынньыгы олус киэргэттэ. Сахалыы таҥас күрэҕэр кыайыылааҕынан кырачаан Харысхан Копырин тахсан көрөөччүлэр эҕэрдэлэрин тутта. Иккис миэстэҕэ Филипп Пахомов, үһүс миэстэҕэ Наина Зыкова тахсан бэлиэ суругунан, сертификатынан наҕараадаланнылар. Оҕолорбутугар анаан сүүрүү күрэҕин нэһилиэккэ спорт исписэлииһэ Мария Заборовская тэрийдэ. Ким быһыйын быһаарсар күрэххэ кыргыттарга кыра бөлөхтөргө 1-кы миэстэни Тунаара Кузьмина, 2-с миэстэни Айсаана Александрова, 3-с миэстэни Айаана Александрова ылан үөрдүлэр. Улахаттарга Амелия Алексеева 1-кы миэстэ, Мичийэ Кузьмина 2-с миэстэ, София Заборовская 3-с миэстэ буоллулар. Уолаттарга кыраларга Филипп Пахомов кыайыылаах таҕыста. Иккискэ Максим Тарский, үһүскэ Вася Иванов тахсан кыайыылаах үрдүк аатын сүктүлэр. Улахан уолаттарга Дайаан Ефремов бастакы, Эрчим Александров иккис, Емельян Никифоров үһүс буолан элбэх уолтан инники тахсан кыайыы кынаттаннылар.
Бу күн көхтөөх кыттааччылар эдьиийдии балыс Тунаара уонна Уйгулаана Кузьминалар, Айза Пахомова, София Заборовская, Даниель Никитин, Руслан Тарский, Лева Сигаев бэлэхтэри туттулар. Оҕо көмүскэлин күнүн чэрчитинэн ыытыллар «Ыллаа-туой оҕо саас!» күрэххэ кыайыылааҕынан Алгыстаана Михайлова, иккис миэстэҕэ Ясмина Шамшиева, үһүс миэстэҕэ Аяна Никифорова тахсан сертификаттары туттулар. Онтон Гран-при хаһаайкатынан эдьиийдии балыс Арина, Айаана, Айсаана Александровалар тахсан 1500 солкуобайдаах сертификаты туттулар.
Ыһыахха үөрүү-көтүү кэннэ сынньалаҥ киинигэр «Эдэр саас» диэн кэнсиэргэ эстрада саҥа ааттара Какитока уонна Куйаар Уола ылбаҕай ырыаларын бэлэхтээтилэр. Ити курдук умнуллубат күн ырыалаах-тойуктаах, үҥкүүлээх-битиилээх, бириистэрдээх көрдөөх оонньуулардаах киэһэ бэлэхтэнэн, нэһилиэк дьоно үөрэ-көтө күннэрин атаардылар. Сонно тута киирии билиэтинэн Андрей Селляхов «TourBerry» турагенствоттан Турцияҕа сынньалаҥ сертификаттара Матрена Павловна Макароваҕа, Александра Петровна Ефремоваҕа, Матрена Петровна Петроваҕа түбэһэн, чэпчэтиилээх путевканан убаастыыр далбар хотуттарбыт ыраах Турцияҕа айанныахтара.
Ирина КОРЯКИНА -ОЛЕСОВА