Бүгүн Василий Ильич Жожиков аатын сүгэр Амматааҕы оҕо библиотеката төрүттэммитэ 65 сылын бэлиэтиир дьоро тэрээһин буолла. Бэлиэ күнүнэн үлэһиттэргэ, бэтэрээннэргэ бэл Новосибирскай куораттан биир идэлээхтэриттэн эҕэрдэ көтөн кэллэ.
Хас биирдии киһи оҕо саастан төрүттээх. Аны бука бары кыра сылдьан биир кинигэлэри ааҕан улааппыт буолуохтаахпыт. Онон хас биирдиибитин бибилэтиэкэ эмиэ сомоҕолуур диэтэхпитинэ сыыспаппыт буолуо. Манна кыра киһи ааҕыы киэҥ дуолугар бастакы хардыыларын оҥорор, кинигэни таптыырга, ааҕыыны биһирииргэ улаатар. Онуоха, кэм ирдэбилин кытта тэҥҥэ хаамсан бибилэтиэкэрдэр үлэлэригэр саҥалыы сүүрээннэри киллэрэллэр, оҕону ааҕыыга угуйарга саҥаттан саҥа көрүҥнэри көрдүүллэр. Бэйэтин туһугар эмиэ уустуктардаах, үлэһиттэн өрүү олох үөһүгэр буолууну ирдиир үлэ.
Бүгүн, Амматааҕы оҕо бибилэтиэктин үбүлүөйдээх күнүгэр ыҥырыылаах ыалдьыттар — улуус баһылыгын социальнай боппуруостарга солбуйааччы Нюргуяна Илларионова, улуустааҕы култуура уонна норуот айымньытын салалтатын салайааччы Иван Иванов, Амма нэһилиэгин баһылыгын солбуйааччы Альберт Яковлев, улуустааҕы библиотечнай тиһик дириэктэрэ Прокопий Прокопьев, Василий Ильич Жожиков оҕолоро, сиэннэрэ, оҕо бибилэтиэкэтин кытта ыкса үлэлэһэр тэрилтэлэр бэрэстэбиитэллэрэ, Василий Жожиков аатынан «Бастыҥ ааҕааччы» анал аат стипендияттара уонна бибилэтиэкэ көхтөөх ааҕааччылара коллективы кытта үөрүүлэрин тэҥҥэ үллэстэн, ыллаан-туойан, хоһоон ааҕан тэрээһини киэргэттилэр.
Эҕэрдэлэргэ Новосибирскайдааҕы В.В. Куйбышев аатын сүгэр Россияҕа соҕотох спортивнай бибилэтиэкэ коллектива кыттыста. Санатар эбит буоллахха, В.И. Жожиков өссө 1969 сыллаахха Саха сирин оройуоннарын библиотекаларын сэбиэдиссэйдэрин мунньан Новосибирскай куоракка семинар-практикумҥа кытыннаран турар. Маны таһынан ити Амматааҕы оҕо бибилэтиэкэтэ инникитин спортивнай библиотека статуһу сүгэригэр күн бүгүн улахан үлэ бара турарын кытта эмиэ сибээстээх.
Олоххо көхтөөх, эрчимнээх коллективы өссө төгүл үбүлүөйгүтүнэн эҕэрдэлиибит. Эһиэхэ оҕолор хаампыт ыллыктара хаһан даҕаны оспотун, өрүү элбэх ааҕааччылаах буолуҥ.
«Амма олоҕо» хаһыат.