Саха Өрөспүүбүлүкэтин бастакы Бэрэсидьиэнэ Михаил Николаев 1999 сыллааҕы уурааҕар «Саха Өрөспүүбүлүкэтигэр доруобуйаны бөҕөргөтүүгэ сүүрүү уонна хаамыы күнүн ыам уонна балаҕан ыйдарын сыл аайы ыытарга» диэн суруллубут. Бу ыйдар бүтэһик өрөбүллэригэр Амма Наахара нэһилиэгэр Сүүрүү күннэрэ сыллата ыытыллаллар.
Чөл олоҕу өрө тутан, Үлэ Дьоруойа П.И. Яковлев аатынан Амма Наахара орто оскуолатын үөрэнээччилэрэ Бүтүн Өрөспүүбүлүкэтээҕи сүүрүүгэ кытыннылар.
Сүүрүүгэ сыллата үөрэтэр оҕолорбут өрө көтөҕүллэн кытталлар. Бу күрэх маассабай спорт сайдарыгар, спордунан дьарыктанар киһи сыллата элбээн иһэригэр төһүү күүс буолар. Сүүрүүгэ онус кылааска диэри үөрэнээччилэр кытыннылар, — диэн күрэх тэрийээччитэ, оскуола физкультураҕа учуутала Михаил Романов сэһэргиир.
1 — 2 кылаастарга:
Кыргыттарга Уйгулаана Кузьмина бастакы, Алиса Максимова иккис, Алика Ефремова үһүс буоллулар. Уолаттарга Тимур Макаров бастакы, иккис Саша Александров, үһүс Валера Татаринов таҕыстылар.
3 — 4 кылаастарга:
Кыргыттарга Тунаара Кузьмина бастакы, иккис Айсаана Александрова, үһүс Айаана Александрова; уолаттарга Сеня Александров бастакы, Роберт Пахомов иккис, Айтал Макаров үһүс миэстэ буоллулар.
5 — 7 кылаастарга:
Кыргыттарга Айхаана Макарова бастакы, Алгыстаана Михайлова иккис, Сайнаара Пахомова үһүс миэстэлэннилэр. Уолаттарга Дайаан Ефремов бастакы, Эрчим Александров иккис, Ваня Пахомов уонна Эрсан Егоров үһүс таҕыстылар.
8 — 10 кылаастарга:
Кыргыттарга Саина Максимова маҥнайгы, Нарыйа Никитина иккис, Алгыстаана Михайлова үһүс; уолаттарга Эрхаан Ефремов бастакы, Айдын Илларионов иккис, Вася Кузьмин үһүс миэстэлэргэ тахсан быһый атахтаахтарын, уһун тыыннаахтарын көрдөрдүлэр.
Кыайыылаахтар грамотанан, мэтээллэринэн наҕараадаланнылар. Күрэҕи оскуола иитэр үлэҕэ дириэктэри солбуйааччы Марина Макарова уонна оскуола дириэктэрин сүбэһитэ Феодосия Максимова иилээн-салайан ыыттылар.
Бу күн көр-күлүү, үөрүү-көтүү хойукка диэри дуорайда. Айылҕа араас өҥүнэн киэргэнэн турар кэмигэр Амма Наахараҕа быйылгы үөрэх сылыгар үөрэнээччилэргэ чөл олоҕу көҕүлүүр акылаат уурулунна.
- Ирина КОРЯКИНА-ОЛЕСОВА,
- «Амма олоҕо» хаһыат уопсастыбаннай кэрэспэдьиэнэ, Амма Наахара.