Балаҕан ыйын 27 күнэ – Саха Өрөспүүбүлүкэтин Судаарыстыбаннаһын күнэ. Бу сүдү күнү бэлиэтээн Cатаҕай оскуолатыгар үөрүүлээх быһыыга-майгыга линейка буолла. Дойдубут былаахтара өрөгөй ырыатынан күөрэччи көтөҕүллэн тэлэмнээбитэ барыбыт сүрэхпитин долгутта.
Учууталлар, үөрэнээччилэр бу үөрүүлээх күҥҥэ сахалыы таҥастарын кэтэн кэлбиттэрэ, төрөөбүт дойдубутунан, саха буоларбытынан киэн туттуу бэлиэтэ көһүннэ. Бүгүн хас биирдии үөрэнээччи, үлэһит сомоҕолоһуу уонна ийэ дойдуга бэриниилээх буолуу салгынын, тапталын үөскэттилэр.
Үөрүүлээх линейканы история учуутала Саргылаана Иванова иилээн-саҕалаан ыытта.
Бу бэлиэ күҥҥэ биһиги хайаатар даҕаны өйдөөн, санаан, ахтан аһарабыт дойдубут быраабын уонна көҥүлүн туһугар охсуспут биир дойдулаахтарбытын, — диэн бэлиэтээн эттэ.
Дойдубут устуоруйатын ытыктыах уонна өйдүөх тустаахпытыгар, биһиги күүспүт, сайдыыбыт бары биир сомоҕо буоларбытыгар тохтоото.
Линейкаҕа нэһилиэкпит баһылыга Алексей Шишигин эҕэрдэтин тириэртэ. Хас биирдии үөрэнээччи үөрэнэр кылаата, саха буоларынан киэн туттуута дойдубут сайдарын туһугар туһуланарын бэлиэтээн эттэ уонна ханна да сырыттаргыт Сахабыт сирин былааҕын көүрэччи тута сылдьыҥ диэн эдэркээн сүрэхтэри инникигэ, сайдыыга тускулаата.
- Христина СКРЯБИНА,
- «Амма олоҕо» хаһыат уопсастыбаннай кэрэспэдьиэнэ, педагог-библиотекарь, Сатаҕай.